თბილისის სააპელაციო სასამართლოსთან დავით როსტომაშვილზე თავდასხმაში მსჯავრდებულების ოჯახის წევრებმა აქცია გამართეს. ადგილზე იმყოფებოდნენ მსჯავრდებულ ზურაბ ქუთელიას, ბექა კირვალიძის და არტემ აგაჯანოვის ოჯახის წევრები და მეგობრები. მათი მთავარი მოთხოვნა იყო, მსჯავრდებულების საქმე სააპელაციო სასამართლოს მოსამართლეთა კოლეგიამ განიხილოს და არა კონკრეტულად ერთმა მოსამართლემ, მანუჩარ კაპანაძემ.
„აქციაზე ვითხოვდით საქმის კოლეგიალურად განხილვას, ეჭვი არ შეგვაქვს მოსამართლის კომპეტენციაში და იმაში, რომ იგი არ იქნება დამოუკიდებელი თავის გაფაწყვეტილებაში. თუმცა, თავად ზურას, მის ოჯახს და საზოგადოებას რომ ჰქონდეს სამართლიანობის განცდა, სასურველია, საქმის კოლეგიური წესით განხილვა.. მოვითხოვთ, რომ მოსამართლემ გაითვალისწინოს ის მტკიცებულებები, რაც ზურას უდანაშაულობას ადასტურებს. ვითხოვთ, ზურას განთავისუფლებას და დანარჩენი ორის მიმართ კვალიფიკაციის შეცვლას“, - განაცხადა „ჯი-ეიჩ-ენთან“ ზურაბ ქუთელიას ადვოკატმა, გიორგი ბარდაველიძემ.
ცნობისთვის, დავით როსტომაშვილს თავს 2017 წლის 14 ივნისს დაესხნენ. საქმეზე დაკავებულია 3 პირი. თბილისის საქალაქო სასამართლომ არტემ აგაჯანოვს 6 წლიანი, ზურაბ ქუთელიას 7 წლიანი და ბექა კირვალიძეს 10 წლიანი პატიმრობა შეუფარდა. დაცვის მხარემ საქალაქო სასამართლოს განაჩენი სააპელაციო წესით გაასაჩივრა, თუმცა საქმის მეორე ინსტანციაში განხილვა ჯერ არ დაწყებულა.
