თბილის მერი კახა კალაძე აცხადებს, რომ „მთავრობაში განსახორციელებელ ცვლილებებზე გუნდში ამ ეტაპზე საუბარი არ მიმდინარეობს“. ამის შესახებ მან განცხადება დღეს ჟურნალისტებთან „ქართული ოცნების“ ყრილობის დასრულების შემდეგ გააკეთა, სადაც ბიძინა ივანიშვილი პარტიის თავმჯდომარედ აირჩიეს.
„თუ რაიმე გადაწყვეტილებები იქნება მიღებული ამასთან დაკავშირებით, პრემიერ-მინისტრთან ერთად, თქვენთვის ცნობილი გახდება,“ - განაცხადა კალაძემ. თუმცა, მან ივანიშვილის პარტიის თავმჯდომარედ არჩევის მნიშვნელობაზე გააკეთა აქცენტი.
"ბიძინა ივანიშვილმა ისაუბრა სამ მიმართულებაზე და ერთ-ერთი იყო, თუნდაც, გუნდში აზრთასხვადასხვაობა, ან პატარა გაუგებრობა. მე ყოველთვის ვიმეორებდი და ახლაც გავიმეორებ, რომ, როდესაც სხვადასხვაობა არსებობს, ეს არის ნორმალური და ასეც უნდა იყოს. ყველას ერთნაირი მოსაზრება ვერ გვექნება. თუმცა, ეს ყველაფერი გუნდის შიგნით უნდა განიხილებოდეს და რჩებოდეს გუნდში. თუ გუნდში განხილვის შემდეგ ვერ მოხდება შეჯერება, ადამიანს აქვს შესაძლებლობა, გარეთ გავიდეს და დააფიქსიროს თავისი პოზიცია. თუმცა, პიროვნული შეურაცხყოფები კატეგორიულად მიუღებელია", - განაცხადა კალაძემ.
