თბილისის საქალაქო სასამართლოში დასრულდა ხორავას ქუჩაზე მოზარდებს შორის მომხდარი მკვლელობის საქმის განხილვა.
როგორც ჟურნალისტებთან საქმის პროკურორმა, ზვიად ფხაკაძემ განაცხადა, დღევანდელ პროცესზე ბრალდების რამდენიმე მოწმე დაიკითხა, ასევე გამოკვლეულ იქნა წერილობითი მტკიცებულებები.
"ბრალდების მხარის მიერ სამი არასრულწლოვანი მოწმე უნდა დაკითხულიყო, რომლებიც კონფლიქტში მონაწილე ბრალდებულს და ერთ-ერთ მოწმეს შეხვდნენ კონფლიქტის შემდეგ. თუმცა, დაცვის მხარესთან შეთანხმებით ბრალდების მხარემ დააფიქსირა პოზიცია, რომ ხსენებული მოწმეების დაკითხვა აღარ გახდა საჭირო, რადგან დაცვის მხარემ მათი ჩვენებები, რომელიც გამოძიების სტადიაზე აქვთ მიცემული, უდაო გახადა. შესაბამისად, გამოკითხვის ოქმებში დაფიქსირებული ინფორმაცია სრული მოცემულობით შეგვიძლია გამოვიყენოთ, როგორც დაცვის მხარემ, ასევე ბრალდების მხარემ. ხსენებული პირების მიერ მიცემული ინფორმაცია ნაკლებად ეხებოდა ფაქტობრივ გარემოებებს და მათში გადმოცემული გარემოებები ნაკლებად კავშირშია ხორავას ქუჩაზე განვითარებულ მოვლენებთან.
ბრალდების მხარეს დღევანდელ სასამართლო სხდომაზე 2 მოწმის დაკითხვა უნდა მოეხდინა, რომლებიც მოცემულ საქმეზე ბრალდებულები არიან, მათ მიმართ საქმე ცალკეა გამოყოფილი და მათი განხილვა სასამართლო სხდომაზე ცალკე მიმდინარეობს. ხსენებულმა პირებმა მათთვის კანონით მინიჭებული უფლება გამოიყენეს და განაცხადეს, რომ შესაძლებელია დღევანდელ სასამართლო სხდომაზე მათ მიერ მიცემული ინფორმაცია მათი ინტერესების წინააღმდეგ ყოფილიყო გამოყენებული. დააფიქსირეს პოზიცია, რომ საკუთარი თავის წინააღმდეგ ისინი სასამართლოს ჩვენებას არ მისცემდნენ.
ბრალდების მხარის მიერ ასევე გამოკვლეულ იქნა წერილობითი მტკიცებულებები. წერილობითი მტკიცებულებების გამოკვლევა ბრალდების მხარის მიერ დასრულდა .ბრალდების მხარე მომდევნო სხდომაზე რამდენიმე მტკიცებულების გამოკვლევას გეგმავს, შესაბამისად, ამის შემდეგ იქნება მიღებული გადაწყვეტილება თუ რამდენი პროცესი დაგვჭირდება, ან საერთოდ დაგვჭირდება თუ არა პროცესი ჩვენი მტკიცებულებების გამოსაკვლევად.
დღეს ასევე ერთ-ერთი მოწმის დაკითხვა განხორციელდა, რომელმაც დააფიქსირა პოზიცია რომ შემთხვევის ადგილზე მას შემდეგ იმყოფებოდა,რაც კონფლიქტი ამოიწურა და დაჭრილი დაზარალებული ნახა რომელიც შემდეგში სამწუხაროდ, გარდაიცვალა.
სრულად დასრულდა თუ არა მოწმეების დაკითხვა, ან მტკიცებულებების გამოკვლევა ბრალდების მხარის მხრიდან, ასევე ნივთიერი მტკიცებულებების გამოკვლევა, ამ ეტაპზე ამ პოზიციას არ ვაფიქსირებ. მომდევნო პროცესზე შესაძლებელია დავაფიქსიროთ რომ მტკიცებულებების გამოკვლევა დასრულდა.
ასევე გამოკვლეულ იქნა ვიდეომასალის ნაწილიც, რომელიც 51-ე სკოლის წინ მდებარე ტერიტორიაზე დამონტაჟებული ვიდეო კამერებიდანაა, რომელზეც ასახულია, როგორ იკრიბება რამდენიმე ბავშვი. თუმცა, მათი იდენტიფიკაცია ნაკლებად შესაძლებელია ვიდეოს ხარისხის გათვალისწინებით", - განაცხადა ფხაკაძემ.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
