"დღევანდელი მოწმეები სავარაუდოდ, ჩხუბის შემდეგ განვითარებულ მოვლენებზე ისაუბრებენ, კერძოდ იმაზე, თუ როგორ მოხდა გარკვეული პირების გადამალვა, რა შემხებლობა ჰქონდათ მოწმეებს ბრალდებულებთან და როგორ განვითარდა უკვე მოვლენები შემდეგ საათებში", - განაცხადა ჟურნალისტებთან ხორავას ქუჩაზე მოზარდების მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
სავარაუდოდ, დღეს ბრალდების მოწმეების დაკითხვა დასრულდება ამის შემდეგ, უკვე სასამართლო დაცვის მხარის მტკიცებულებების გამოკვლევაზე გადავა.
"დღევანდელ პროცესზე დასაკითხი პირები ფაქტის თვითმხილველები არ იქნებიან ვინაიდან, ჩხუბში მონაწილე ყველა პირი უკვე დაკითხულია სასამართლოში და ყველა ეს მტკიცებულება უკვე გამოკვლეულია.
დღევანდელი სხდომის შემდეგ დაცვის მხარე გადაწყვეტს, რა რიგითობით და რა მტკიცებულებების გამოკვლევას აპირებს სასამართლოში. დაცვის მხარის ძირითადი მტკიცებულებები იქნება ასევე ექსპერტიზის დასკვნები, რომლებსაც წარმოვადგენთ სასამართლოში. ყველა მტკიცებულების შეჯერების შედეგად დარწმუნებული ვარ, რომ სასამართლო მივა იმ დასკვნამდე, რომ არ უნდა გაიზიაროს ბრალდების მხარის პოზიცია და უნდა გაიზიაროს დაცვის მხარის პოზიცია. შემიძლია კატეგორიულად განვაცხადო, რომ უკვე გამოკვლეული ბრალდების მხარის მტკიცებულებებით საერთოდ არ დგინდება, რომ ჩემი დაცვის ქვეშ მყოფმა ჩაიდინა დანაშაული, რომელსაც მას ბრალდების მხარე ედავება", - აცხადებს კაკაბაძე.
მისი განმარტებით, სასამართლოში ჩვენებას უახლოეს დღეებში ბრალდებულები მისცემენ.
"ბრალდებულები აუცილებლად დაიკითხებიან და სასამართლოს მიაწვდიან ამომწურავ ინფორმაციას იმ მოვლენებზე, რასაც ადგილი ჰქონდა კონკრეტულ დღეს. მე დარწმუნებული ვარ, რომ ბრალდებულთა ჩვენებები, სრულ შესაბამისობაში იქნება საქმეში არსებულ უტყუარ მტკიცებულებებთან", - აცხადებს კაკაბაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
