ფრენების მომსახურების ხარისხის გაუმჯობესების მიზნით შპს „საქაერონავიგაციასა“ და ევროპის სააერნაოსნო უსაფრთხოების ორგანიზაცია Eurocontrol-ს შორის, უცხოელი კონტრაჰენტების მონაწილეობით, VOTER-ის სალიცენზიო ხელშეკრულება გაფორმდა. VOTER-ი წარმოადგენს სატესტო სისტემას, რომელიც განკუთვნილია საჰაერო მოძრაობის მართვის ძირითადი კომპონენტების ტესტირებისთვის.
თავის მხრივ კი პროგრამის არსებობა შესაძლებლობას მისცემს შპს „საქაერონავიგაციის“ სხვადასხვა სამსახურს ჩაატაროს ტექნიკური მომსახურება და სისტემების დიაგნოსტიკა, რაც დამატებით უზრუნველყოფს ფრენების მომსახურების ხარისხის გაუმჯობესებას.
როგორც „საქაერონავიგაციაში“ განმარტავენ, ხელშეკრულების გაფორმებიდან 10 თვის ვადაში განხორციელდება ლიცენზიის გადმოცემა და მისი დანერგვა, ხოლო ხელშეკრულებით გადმოცემული ლიცენზიით სარგებლობის ვადა შეადგენს 3 წელს.
შპს “საქაერონავიგაციის“ თბილისის, ბათუმის და ქუთაისის საჰაერო მოძრაობის მართვის შენობებში დაყენებულია ხმოვანი კავშირის სისტემა SITTI. ასევე დამატებით იგეგმება ახალი ხმის ჩამწერი სისტემის დანერგვა სამივე ზემოაღნიშნულ ობიექტზე.
SITTI მეთვალყურეებსა და საჰაერო ხომალდებს შორის კავშირს უზრუნველყოფს რადიოხაზების ან რადიოსადგურების ინტერფეისების გამოყენებით, ასევე სატელეფონო კავშირს შესაბამისი ინტერფეისების გამოყენებით, იგი უზრუნველყოფს არამარტო შიდა კავშირს (პულტებსა და ლოკალური ტელეფონების შორის), არამედ საქართველოს სხვა აეროპორტებთან და მეზობელ FIR-ებთან შესაბამისი ინტერფეისების გამოყენებით.
აღნიშნული სისტემების მომსახურებისთვის Eurocontrol-ის დავალებით შექმნილი იქნა სპეციალური პროგრამული უზრუნველყოფა VOTER-ი.
Eurocontrol-ის განმარტებით, VOTER-ი წარმოადგენს სატესტო სისტემას, რომელიც განკუთვნილია საჰაერო მოძრაობის მართვის ძირითადი კომპონენტების (რადიოხაზები, ხმოვანი კავშირის სისტემები, ხმის ჩამწერი სისტემები) ტესტირებისთვის და 150-ზე მეტი სატესტო სცენარი განსაზღვრულია Eurocontrol-ის მიერ EUROCAE-ED137 (ციფრული მეთოდით ხმის კოდირება) სტანდარტების მოთხოვნებზე დაფუძნებით.
თავის მხრივ კი სისტემა შემუშავებული იქნა Eurocontrol-ის დავალებით კომპანია „Spirent Communications SAS (Spirent)“-ის მიერ, რომელიც ტენდერის საფუძველზე შეირჩა.
VOTER-ის სისტემის ინტელექტუალური საკუთრების უფლებები ეკუთვნის Eurocontrol-ს და ამის გამო სისტემა არის უფასო მისი წევრი ქვეყნებისთვის.
როგორც ცნობილია, საქართველო Eurocontrol-ის წევრი ქვეყანა 2014 წლის 1 იანვარს გახდა და შესაბამისად მისთვის VOTER-ის სისტემით სარგებლობა არის უფასო.
