ვიცე-პრემიერი, საქართველოს საგარეო საქმეთა მინისტრი მიხეილ ჯანელიძე, ევროპის დღეების ფარგლებში, პროექტ „ევროპული ახალგაზრდობის" მონაწილე სტუდენტებს შეხვდა და საქართველოს მიერ ევროინტეგრაციის კუთხით მიღწეულ წარმატებასა და პერსპექტივებზე ისაუბრა.
მიხეილ ჯანელიძემ, თბილისისა და რეგიონების უნივერსიტეტების სტუდენტებთან საქართველოს ევროპული ინტეგრაციის მიმართულებით მთავრობის ამბიციურ დღის წესრიგზე ისაუბრა და აღნიშნა, რომ ქვეყნის საბოლოო მიზანს ევროკავშირში გაწევრიანება წარმოადგენს.
„საქართველოს ევროპული მომავალი ახალგაზრდების, საზოგადოების ხელშია. პროგრესი, რომელსაც ჩვენ მივაღწიეთ, შესაძლებელი გახდა მხოლოდ ამ პროცესისადმი საზოგადოების მტკიცე, ურყევი მხარდაჭერით. ჩვენ განვეკუთვნებით ევროპულ ცივილიზაციას და ყოველთვის მივისწრაფოდით ევროპული ოჯახისა და სრულფასოვანი წევრობისკენ. დღესაც, საზოგადოებაში არის ძალიან დიდი მხარდაჭერა ევროპული ინტეგრაციის პროცესისადმი და რომ არა ასეთი ფართო საზოგადოებრივი მხარდაჭერა, ჩვენ ვერ მივაღწევდით იმ წარმატებას, რომელსაც მივაღწიეთ" - აღნიშნა მიხეილ ჯანელიძემ.
მინისტრმა სტუდენტებს მიაწოდა ინფორმაცია საქართველოს მთავრობის სამშვიდობო პოლიტიკის შესახებ და ყურადღება გაამახვილა კონფლიქტის მშვიდობიანი დარეგულირების მექანიზმებზე. მიხეილ ჯანელიძემ ხაზი გაუსვა აღნიშნულ პროცესში ევროკავშირის მნიშვნელოვან როლს. მან ასევე აღნიშნა, რომ საქართველო უსაფრთხოების კუთხით, ევროკავშირის სანდრო პარტნიორია.
მიხეილ ჯანელიძემ ყურადღება გაამახვილა უვიზო მიმოსვლაზე, რომელიც ევროინტეგრაციის გზაზე ჩვენს უმნიშვნელოვანეს მონაპოვარს წარმოადგენს. მან სტუდენტებს ევროკავშირში ინტეგრაციის საგზაო რუკის კონცეფცია წარუდგინა.
„ჩვენ შევიმუშავეთ კონცეფცია, დაანონსდა ევროკავშირში ინტეგრაციის საგზაო რუქის შემუშავება. ეს არ ნიშნავს საგზაო რუქას წევრობისთვის, არამედ საგზაო რუქას მეტი ინტეგრაციისათვის, რათა ჩვენ გავაჩინოთ წევრობის შესაძლებლობა. ის გულისხმობს ასოცირების შეთანხმების ეფექტურ იმპლემენტაციას და ასოცირების მიღმა ძალიან ბევრი ნაბიჯის გადადგმას"-განაცხადა მიხეილ ჯანელიძემ.
მოწვეულ სტუდენტებს სიტყვით ასევე მიმართა ნატოსა და ევროკავშირის შესახებ საინფორმაციო ცენტრის დირექტორმა, ნინო ბოლქვაძემ. შეხვედრის დასასრულს, მინისტრმა სტუდენტების შეკითხებს უპასუხა.
„ევროპული ახალგაზრდობა" პროექტის ფარგლებში, თბილისიდან და რეგიონული უნივერსიტეტებიდან ჩამოსული სტუდენტებისთვის ეწყობა ორდღიანი სემინარი, რომლის მთავარი თემაც საქართველოს საგარეო პოლიტიკის პრიორიტეტები და ქვეყნის ევროპული ინტეგრაციაა. სემინარის ფარგლებში, სტუდენტები ეცნობიან საქართველოს ევროპული ინტეგრაციის პროცესს, ისინი სხვადასხვა ექსპერტებს შეხვდებიან.
აღსანიშნავია, რომ ევროპის დღეების მიზანს ევროკავშირისა და საქართველოს ურთიერთობების, მიმდინარე ინტეგრაციის პროცესის შესახებ საქართველოს მოქალაქეების ინფორმირება და სხვადასხვა სამიზნე ჯგუფების ჩართულობა გაზრდაა. „ევროპის დღეები 2018" 22 მაისამდე გაგრძელდება. ღონისძიებები საგარეო საქმეთა სამინისტროს, სსიპ-ის „საინფორმაციო ცენტრი ნატოსა და ევროკავშირის შესახებ" და ევროკავშირის წარმომადგენლობის ორგანიზებით, წელს მეექვსედ იმართება.
