ხვალ თბილისში გაიმართება ჩვენი პარტიის ყრილობა, ავირჩევთ პარტიის ახალ თავმჯდომარეს და დავამტკიცებთ პოლიტიკური საბჭოს განახლებულ შემადგენლობას. ყრილობას აქვს მხოლოდ სამუშაო დატვირთვა, მას დაესწრებიან მხოლოდ დელეგატები და ჩატარდება კამერულ სამუშაო ვითარებაში, – ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
მისი თქმით, ყრილობის პირველი ნაწილი ტექნიკური ხასიათისაა, სადაც მდივანი შეირჩევა და დღის წესრიგი დამტკიცდება, ხოლო მეორე ნაწილში დაგეგმილია პარტიის ლიდერების გამოსვლა, ასევე, აირჩევა პარტიის ახალი თავმჯდომარე და დამტკიცდება პოლიტსაბჭოს შემადგენლობა.
„პოლიტიკური საბჭოს განახლებულ შემადგენლობაზე უკვე იმსჯელა დღეს არსებულმა პოლიტსაბჭომ. შესაბამისად, ეს შემადგენლობა უკვე ფორმალურად არის წარდგენილი ყრილობის წინაშე და ხვალ ყრილობის დელეგატები დაამტკიცებენ განახლებულ შემადგენლობას“, – განაცხადა თალაკვაძემ.
