"კითხვაზე, მირზა სუბელიანი კალანდიების სახლში რატომ მივიდა, პასუხს ვერ გაგცემთ. მირზა სუბელიანი სასამართლოს წინაშე წარსდგება და მსგავსი კითხვები დაესმება. არ იფიქროთ, რომ მირზა სუბელიანს, ან ვინმე სხვას, ვინმე ხელს აფარებდეს", - განაცხადა ჟურნალისტებთან ხორავას ქუჩაზე მოზარდებს შორის მომხდარი მკვლელობის საქმის პროკურორმა, ზვიად ფხაკაძემ.
მისი განმარტებით, დღეს დაკითხულმა გამომძიებლებმა საქმეზე ჩატარებული საგამოძიებო მოქმედებების შესახებ ისაუბრეს.
"ბრალდების რამდენიმე მოწმე, მათ შორის, 2 გამომძიებელი დაკითხა. მათ ისაუბრეს საქმეზე ჩატარებული საგამოძიებო მოქმედებების თაობაზე. ხსენებული გამომძიებლები არიან ის პირები, რომლებმაც უშუალოდ ჩაატარეს საგამოძიებო მოქმედება, როგორც მიხეილ კალანდიასთან, ასევე მის მამასთან, რაზეც მიხეილ კალანდიამ განაცხდა, თითქოს, ზეწოლა იყო. თუმცა, აღნიშნული პოზიცია მოგვიანებით შეცვალა.
გამომძიებლებმა კატეგორიულად გამორიცხეს ხსენებულ პირებზე რაიმე სახის ზემოქმედების განხორციელება. ასევე დაადასტურეს, რომ მათი დაკითხვა მშვიდ, ნორმალურ ვითარებაში, სხვა პირთაგან განცალკევებით მიმდინარეობდა. მიხეილ კალანდიას დაკითხვას მისი კანონიერი წარმომადგენელი, მამა ესწრებოდა. დაკითხვის დროს რაიმე სახის პრეტენზია, შენიშვნა მათი მხრიდან არ გაცხადებულა. გამომძიებლებმა სხვა საგამოძიებო მოქმედებების ჩატარებასთან დაკავშირებითაც ისაუბრეს. დადასტურდა რომ მათ მიერ ჩატარებული საგამოძიებო მოქმედებები კანონის შესაბამისობაში იყო", - აცხადებს ფხაკაძე.
როგორც ის განმარტავს, დღეს დაკითხულმა მოწმემ, რომელიც ხორავას ქუჩაზე არსებული მაღაზიის მეპატრონეა, მოზარდებს შორის ჩხუბზე ისაუბრა, თუმცა, მოწმეს ცემის ფაქტი არ დაუნახავს.
"მან ისაუბრა კონკრეტულ ფაქტობრივ გარემოებებთან დაკავშირებით, მან ფარდულში მოჩხუბარი ბიჭები დაინახა, მაგრამ განაცხადა, რომ ცემის ფაქტი არ დაუნახავს. გამოძიების ეტაპზე მან განაცხადა თითქოს, ჩხუბი იყო, მაგრამ ვინ ვის ურტყამდა, ამის კონკრეტიზაცია ვერ მოახდინა. მან კონკრეტიზაცია მოახდინა იმ გარემოებების, რაც გამოძიების სტადიაზე განაცხადა", - აღნიშნავს პროკურორი.
როგორც ფხაკაძე განმარტავს, შემთხვევის ადგილზე წითელი მანქანის მძღოლის ყოფნა დღეს დაკითხულმა მოწმემაც დაადასტურა, თუმცა, მძღოლის რაიმე სახით ბრალეულობა არ იკვეთება.
"წითელი მანქანის შემთხვევის ადგილზე ყოფნა დადასტურდა, ამას არც ბრალდების მხარე არ უარყოფს. მოწმემ ისაუბრა, თუ რა ვითარებაში მოხდა წითელი მანქანის გასვლა და რა მდგომარეობაში იმყოფებოდნენ სხვა პირები როცა ეს მანქანა გადიოდა. მოწმის განმარტებით, როცა წითელი მანქანის მძღოლი მანქანაში ჯდებოდა, ჩხუბი მიმდინარეობდა, მაგრამ დაინახა თუ არა მოჩხუბარი ბიჭები, ან ფარდულში მყოფი ბიჭები, აღნიშნულთან დაკავშირებით, მოწმე ინფორმაციას არ ფლობს", - აღნიშნავს პროკურორი.
შემდეგი პროცესი 11 მაისს, 13:00 საათზე ჩაინიშნა.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
