თბილისის საქალაქო სასამართლოში ხორავას ქუჩაზე მოზარდებს შორის მომხდარი მკვლელობის საქმის განხილვა მიმდინარეობს.
როგორც ჟურნალისტებთან საქმის პროკურორმა, ზვიად ფხაკაძემ განაცხადა, დღეს ბრალდების მხარე საგამოძიებო მოქმედებებში მონაწილე გამომძიებლებს და ფაქტის თვითმხილველ მოწმეს დაკითხავს.
"დღევანდელ სასამართლო სხდომაზე ბრალდების მხარე გააგრძელებს მტკიცებულებების გამოკვლევას. კერძოდ, დაიკითხება რამდენიმე გამომძიებელი, რომლებმაც საქმეზე ჩაატარეს საგამომძიებლო მოქმედებები და აღნიშნულის შედეგად, მნიშვნელოვანი ინფორმაციები იქნა მოპოვებული. აღნიშნულ მტკიცებულებებში ასევე შედის ვიდეომასალა, რომელიც ასახავს კონფლიქტის ადგილზე მისვლის გარემოებებს, ფაქტობრივ დეტალებს. ამასთანვე, დაიკითხება კონფლიქტის ერთ-ერთი თვითმხილველი პიროვნება, რომელიც იმ დეტალებთან დაკავშირებით ისაუბრებს, რაც მან ხორავას ქუჩაზე განვითარებული მოვლენების დროს უშუალოდ ნახა. ასევე დაიკითხება ერთი პიროვნება, რომელიც უშუალოდ მონაწილეობდა კონკრეტულ საგამოძიებო მოქმედებების ჩატარებაში და ისაუბრებს იმ საგამოძიებო მოქმედებებთან დაკავშირებით, რაც საქმეზეა დართული და რაც გამოკვლეული იქნება, ეს შეეხება ვიდეომასალას.
თვითმხილველი პირი არასრულწლოვანი არ არის, ის არის პიროვნება, რომელსაც გარკევული კომერციული ობიექტი გააჩნია ადგილზე და აღნიშნული ობიექტის მფლობელია", - აცხადებს ფხაკაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
