“ყველა შემთხვევა, რომელიც მოზარდების თვითმკვლელობას და თვითმკვლელობამდე მიყვანის მცდელობას ეხება, შესწავლილია და სრული პასუხისმგებლობით ვაცხადებ, არც ერთ კონკრეტულ შემთხვევაში საქმე ინტერნეტთამაშ “ლურჯ ვეშაპთან“ არ გვქონია,” - ეს განცხადება პარლამენტის თავდაცვისა და უშიშროების კომიტეტის სხდომაზე შს სამინისტროს კიბერდანაშაულის წინააღმდეგ ბრძოლის სამმართველოს ტექნოლოგიების, კვლევის და დანერგვის განყოფილების უფროსმა, ივანე კაციტაძემ, გააკეთა.
როგორც მან აღნიშნა, ამ თამაშს არ გააჩნია არც ინტერნეტაპლიკაციის, არც ვებგვერდის სახე და წარმოადგენს მხოლოდ ფსიქოლოგიური დომინანტის დომინირებას სუსტ მსხვერპლზე. კიბერდანაშაულთან ბრძოლის სამმართველოს დეტექტივ-გამომძიებელმა, გიორგი ჯაფარიძემ, კი აღნიშნა, რომ „გამოძიებით მოზარდების “ლურჯ ვეშაპთან“ კავშირი არ დასტურდება“.
“უკანასკნელი ერთი წლის განმავლობაში საკმაოდ აქტუალური თემაა სასიკვდილო ინტერნეტთამაშები - განსაკუთრებით “ლურჯი ვეშაპი“. გასული წლის 30 მაისს ჩვენს განაყოფილებაში დაიწყო გამოძიება კონკრეტულად “ლურჯი ვეშაპის“ თამაშის შემქმნელების მხრიდან არასრულწლოვანთა თვითმკვლელობის ან თვითმკველობის მცდელობამდე მიყვანის ფაქტებზე. გამოძიება დღემდე გრძელდება. მინდა გითხრათ, რომ ჩატარდა საკმაოდ მასშტაბური გამოძიება, რომლის ფარგლებშიც აქტიურად ვთანამშრომლობდით განათლების სამინისტროს მანდატურის სამსახურთან. შემოვიდა უამრავი კონკრეტული შეტყობინება მანდატურის სამსახურიდან. ასევე, როდესაც საზოგადოებისთვის ცნობილი გახდა, რომ ჩვენთან მიმდინარეობდა გამოძიება, განცხადებით მოგვმართავდნენ მშობლები, დაინტერესებული პირები, ოჯახების ახლობლები. გამოძიების ფარგლებში გამოიკითხა რამდენიმე ათეული ახალგაზრდა, მათი მშობლები, ახლობლები, ის პირები, ვისაც შესაძლოა რაიმე კავშირი ჰქონოდა ან სცოდნოდა ამ ფაქტთან დაკავშირებით. სრული პასუხისმგებლობით შემიძლია მოგახსენოთ, რომ დღეის მდგომარეობით არც ერთი კონკრეტული ფაქტი არ დადასტურებულა,“ - განაცხადა ჯაფარიძემ.
მისივე ინფორმაციით, თამაში არსებობს და ის ბოლო ორი წლის განმავლობაში აქტიურად იყო გავრცელებული რუსეთის ფედერაციაში.
