თბილისში გამართულ დედაენის რესპუბლიკურ ოლიმპიადაზე მარიამ და შაჰნისე ემილებმა პირველი და მესამე ადგილები დაიკავეს. კალიგრაფიის ეროვნულმა ცენტრმა კი, დების ნაშრომი ერთ-ერთ საუკეთესო ხელნაწერად აღიარა. წარმატებულ მოსწავლეებს „საუკეთესო კალიგრაფების ოჯახის“ ტიტულიც მიენიჭა.
ისინი ქალაქ მარნეულიდან არიან და განათლებას დავით აღმაშენებლის სახელობის სკოლა-ლიცეუმში იღებენ, სადაც ქართულ დედაენას და ქართულ დამწერლობას სწავლობენ.
„მეც და ჩემს დასაც ძალიან მოგვწონს ქართული ენა და ქართულად წერა. ვცდილობთ, ყოველთვის ლამაზად და სუფთად გამოვიყვანოთ ასოები. ძალიან ბედნიერები ვართ, რომ ჩვენი ნაწერი დედაენის ოლიმპიადის გამარჯვებული გახდა. ვეცდებით კიდევ უფრო დავხვეწოთ ქართული და სხვა ოლიმპიადებშიც წარმატებას მივაღწიოთ“, - განაცხადა შაჰნისემ.
გასულ კვირას გამართულ დედაენის ოლიმპიადაზე, რომელიც არაქართულენოვან მოსწავლეებსაც მასპინძლობდა, მარნეულელმა დებმა ერთ-ერთი საუკეთესო ხელნაწერი წარადგინეს, რითიც ჟიურისგან პირველ და მესამე ადგილებთან ერთად საპატიო ჯილდოები და პრიზებიც დაიმსახურეს.
