საპარლამენტო უმრავლესობის წევრი, დიმიტრი ხუნდაძე, მედიასაშუალებებს თხოვნით მიმართავს, სახელმწიფოსთან ერთად აწარმოონ ძლიერი ანტინარკოტიკული პროპაგანდა. ამის შესახებ მან განცხადება ბოლო პერიოდში ნარკოტიკული საშუალებების მიღებით რამდენიმე ახალგაზრდის გარდაცვალების ფაქტთან დაკავშირებით გააკეთა.
როგორც ის აღნიშნავს, ნარკოპოლიტიკის პოპულარიზაციით პრობლემა არ მოგვარდება და დეკრიმინალიზაციას უნდა მივაღწიოთ ძლიერი ანტინარკოტიკული პროპაგანდით, რაშიც მედიის როლი გადამწყვეტია. სწორედ ამიტომ ის მედიას, სახელმწიფოსთან ერთად, აქტიური ანტინარკოტიკული პროპაგანდისკენ მოუწოდებს.
„ნარკოლოგების მოსაზრებით, გარდაცვლილი ახალგაზრდები არ არიან წამალდამოკიდებული პირები, ისინი, სავარაუდოდ, ერთჯერადი მომხმარებლები არიან. სწორედ ეს არის საგანგაშო, რადგან მთელი ამ თვეების განმავლობაში ნარკოტიკების, ნებით თუ უნებლიედ, პოპულარიზაციამ გააძლიერა ინტერესი ახალგაზრდებში. ასევე, ინტერესს აღვივებს და შიშის გრძნობას აქრობს სიტყვა- „მსუბუქი ნარკოტიკი“, რომელიც ახალგაზრდებს უვნებელი ჰგონიათ. რას ნიშნავს მსუბუქი და მძიმე ნარკოტიკი? ნარკოტიკი ყველა საშიშია სიცოცხლისთვის. მივმართავ თხოვნით ყველა მედიასაშუალებას, სახელმწიფოსთან ერთად აწარმოეთ ძლიერი ანტინარკოტიკული პროპაგანდა. ეს ერთ-ერთი მძლავრი იარაღია მოსალოდნელი შედეგების თავიდან ასაცილებლად. ბუნებრივია, შინაგან საქმეთა სამინისტრომ მაქსიმალურად უნდა გაამკაცროს კონტროლი ნარკოტიკების გამსაღებლებზე. ჩვენ კი, პოლიტიკოსებმა უნდა შევიმუშაოთ ისეთი ნარკოპოლიტიკა, რის მიხედვითაც მომხმარებელს არ დავიჭერთ, მაგრამ ამასთანავე მაქსიმალურად შევამცირებთ რისკებს, რათა მომხმარებელთა რიცხვი არ გაიზარდოს,“ - განაცხადა ხუნდაძემ.
