„ამაზე უარეს კანდიდატურას ვერ კი მოიფიქრებდნენ. ხელში ფურცლები, რომ არ მეჭიროს ტაშსაც კი დავუკრავდი“ - ასე შეაფასა "ნაციონალური მოძრაობის" წარმომადგენელმა რომან გოცირიძემ ინფორმაცია იმის შესახებ, რომ შესაძლოა "ქართულმა ოცნებამ" პრეზიდენტობის კანდიდატად სოზარ სუბარი დაასახელოს. რომან გოცირიძის თქმით, ივანიშვილის გადასაწყვეტია ვინ იქნება პრეზიდენტობის კანდიდატი და „სოზარ სუბარი ნამდვილად ჯდება მის გემოვნებაში“ - თუმცა მისივე თქმით, ეს არის ყველაზე უარესი ვარიანტი ვინსზეც კი აქამდე გაჟღერებულა. ის ამბობს, რომ ივანიშვილი კანდიდატურაზე ვერ ჩამოყალიბდა და სწორედ ამიტომ ჭიანურდება მათი მხრიდან კანდიდატურის დასახელებაც. ის არ გამორიცხავს რომ „ხვალ სულ სხვა ვიღაცაზე გავრცელდეს ინფორმაცია“.
რაც შეეხება ოპოზიციის კანდიდატურას, რომან გოცირიძე ამბობს, რომ მიმდინარეობს მუშაობა, რათა ოპოზიციამ ერთი კანდიდატურის დასახელება შეძლოს. თუმცა დეტალებს და შესაძლო კანდიდატებს ჯერჯერობით ვერ ასახელებს.
