ნარკოპოლიტიკის შესახებ ახალი კანონმდებლობის მიღება კიდევ ერთი თვით გადაიდო, - ამის შესახებ გადაწყვეტილება დღეს პარლამენტის ბიუროს სხდომაზე მიიღეს.
საკითხის გადადება „ქართული ოცნების“ წარმომადგენელმა გია ვოლსკიმ მოითხოვა. როგორც მან აღნიშნა, „სამწუხაროა ის ფაქტი, რომ სულ უფრო მეტი ადამიანი ეწირება ნარკოტიკების მოხმარებას და გაისმა ბრალდებები, თითქოს ეს იმის გამო ხდება, რომ პარლამენტი კანონს არ იღებს. რაც ნამდვილად არ შეეესაბამება სიმართლეს“ - განაცხადა გია ვოლსკიმ. მან აღნიშნა, რომ „ამ დაძაბულ ვითარებაში აუცილებელია ხელისუფლებამ და პარლამენტში მმართველმა გუნდმა, მაქსიმალურად შეჯერებული და სწორი გადაწყვეტილება მიიღოს.
იურიდიულ საკითხთა კომიტეტის თავმჯდომარემ ეკა ბესელიამ აღნიშნა, რომ აუცილებელია კიდევ დამატებითი კონსულტაციების გამართვა.
„რაც იმას არ ნიშნავს, რომ ამ პერიოდში ხელისუფლება არაფერს გააკეთებს. ეს დრო სწორედ იმისთვის გვჭირდება რომ კიდევ ერთხელ მოვისმინოთ არგუმენტები და შევჯერდეთ, რა იქნება ყველაზე შედეგიანი“ - ამბობს ეკა ბესელია.
კანონპროექტის ინიციატორი და ავტორი, ჯანდაცვის კომიტეტის თავმჯდომარე, აკაკი ზოიძე მიიჩნევს, რომ ამ ერთი თვის განმავლობაში მაქსიმალურად ამოწურავენ რესურსს პოზიციების შეჯერებასთან დაკავშირებით და ეს პოზიციები თუკი ვერ შეჯერდება, გადაწყდება დადგება თუ არა რომელიმე ინიციატივა ახალი კანონმდებლობის ალტერნატივის სახით. შეგახსენებთ, რომ ახალი კნონმდებლობა ნარკოპოლიტიკის შესახებ პარლამენტს პირველი მოსმენით შარშან აქვს მიღებული. ახალი პოლიტიკის თანახმად, მოხმარება აღარ იქნება სისხლის სამართლით დასჯადი, თუმცა გამკაცრდება მიდგომა რეალიზაციაზე. მეორე მოსმენით კანონპროექტი ჯანდაცვის კომიტეტს განხილული აქვს და სესიაზე განსახილველად საჭიროა იურიდიულ კომიტეტში კანონპროექტის განხილვა. ბიუროს გადაწყვეტილებით პროცესი ერთი თვის შემდეგ განახლდება.
