პარლამენტი მარეგულირებელი კომისიებისათვის ხელფასის ზედა ზღვარის განსაზღვრაზე მსჯელობას იწყებს.
ამის შესახებ გადაწყვეტილება დღეს პარლამენტის დარგობრივი ეკონომიკის კომიტეტის სხდომაზერ მიიღეს.
კომიტეტის წევრებმა პირველი მოსმენით დაუჭირეს მხარი ნაციონალური მოძრაობის წევრის, რომან გოცირიძის საკანონმდებლო ინიციატივას, რომლის თანახმად, მარეგულირებელი კომისიებისთვის, როგორც კომუნიკაციების, ასევე ენერგეტიკისა და წყალმომარაგების წევრებისათვის და ხელმძღანელობისთვის, ხელფასის ზედა ზღვარი განისაზღვრება და ის არ იქნება პრეზიდენტის ხელფასზე მეტი.
როგორც რომან გოცირიძემ აღნიშნა, დღეს, მარეგულირებელი კომისიების ხელფასები თითქმის სამჯერ მეტია პრეზიდენტის ხელფასზეც კი და დიდ დისბალანსს ქმნის სახელფასო სისტემაში.
მმართველი გუნდი რომან გოცირიძის არგუმენტებს იზიარებს. როგორც კომიტეტის თავმჯდომარემ, რომან კაკულიამ განაცხადა „სახელფასო პოლიტიკა შესაცვლელია და მნიშვნელოვანია ამ საკითხზე დიალოგის დაწყება“.
დღეს არსებული მონაცემებით, კომუნიკაციების ეროვნული კომისიის თამჯდომარის ხელფასი არის თვეში 16 537 ლარი, ხოლო რიგითი წევრის ხელფასი 16 338 ლარი. ენერგეტიკისა და წყალმომარაგების ეროვნული კომისიის თავმჯდომარის ხელფასი თვეში12 648 ლარი, რიგითი წევრის 11 900 ლარი. საქართველოს პრეზიდენტის ხელფასი კი დღევანდელი მოცემებით არის თვეში 6 900 ლარი. პრემიერ-მინისტრის 4 250 ლარი, ხოლო, უზენაესი სასამართლოს თავმჯდომარის ხელფასი თვეში 6 500 ლარს შეადგენს.
