ამაზე საშიში პრეცედენტი საქართველოს უახლეს ისტორიაში, გამოხატვის თავისუფლებასთან დაკავშირებით, არ ყოფილა, - ამის შესახებ „აიისას“ ინტერესების დამცველმა გიორგი მშვენიერაძემ თბილისის საქალაქო სასამართლოს გადაწყვეტილებასთან დაკავშირებით განაცხადა.
მისი თქმით, გადაწყვეტილებას, რომელიც დღეს მოვისმინეთ, არაფერი აქვს საერთო არც სამართლიანობასთან და არც ადამიანის უფლებებთან. მისივე თქმით, ეს არის დაბრუნება შუა საუკუნეების ინკვიზიციაში, რაც დღეს საქართველოს სახელით გვამცნო თბილისის საქალაქო სასამართლომ
„ძალიან სამწუხაროა, რომ ამ ქვეყანაში კონსტიტუციური უფლებები ნელ-ნელა ნაბიჯ-ნაბიჯ იქცევა ფარატინა ქაღალდად და უმრავლესობის ან საზოგადოების გარკვეული ნაწილი მორალი-ზნეობის სახელით გვართმევს ადამიანებს ფუნდამენტურ უფლებებს. ამაზე საშიში პრეცედენტი საქართველოს უახლეს ისტორიაში, გამოხატვის თავისუფლებასთან დაკავშირებით, არ ყოფილა და ეს არის სიგნალი, რომ ყველა კარგად დავფიქრდეთ და გავიაზროთ, რა საშიში თამაში დაიწყო სასამართლომ“, - განაცხადა მშვენიერაძემ.
ცნობისთვის, თბილისის საქალაქო სასამართლომ პრეზერვატივ „აიისას“ საქმეზე თბილისის მერიის განცხადება დააკმაყოფილა.
გადაწყვეტილება თბილისის საქალაქო სასამართლოს მოსამართლე ლაშა თავართქილაძემ გამოაცხადა.
საქალაქო სასამართლომ მიიჩნია, რომ პრეზერვატივის შეფუთვაზე ორ თითზე წამოცმული პრეზერვატივისა და თამარ მეფის გამოსახვამ საზოგადოების მორალი და ღირსება შელახა. კომპანია 500 ლარით დაჯარიმდა და წარმოებიდან 4 სახეობის პრეზერვატივის ამოღება დაევალა.
როგორც „ჯი-ეიჩ-ენს“ „საქართველოს დემოკრატიულ ინიციატივაში“ განუცხადეს, „აიისა“ თბილისის საქალაქო სასამართლოს გადაწყვეტილებას სააპელაციოში გაასაჩივრებს.
