ევროპულმა საქართველომ პარლამენტის სხდომათა დარბაზი დატოვა და დებატებში მონაწილეობის მიღებაზე უარი თქვა.
"ევროპული საქართველოს" პოლიტსაბჭოს თავმჯდომარის გიგა ბოკერიას განცხადებით, ბიძინა ივანიშვილისა და გიორგი მარგველაშვილის ურთიერთობა პარლამენტში გასარკვევი არ არის. მისივე თქმით, სწორედ ეს გააპროტესტეს და ამიტომ დატოვეს დარბაზი.
„ჩვენ დავტოვეთ სხდომათა დარბაზი, იმ დამოკიდებულების გამო, რაც მმართველოს გუნდს აქვს. ბოლოს და ბოლოს, მთავრობა აღარ ესწრება ამ დისკუსიას. დისკუსიას, რომელიც ეძღვნება ქვეყანაში არსებულ ვითარებას. ამ დროს კი ქართულმა ოცნებამ არ დაუშვა რეგლამენტის იმგვარი ინტერპრეტაცია, რომელიც პრეზიდენტს საშუალებას მისცემდა მიეღო დებატებში მონაწილეობა. ახლა პოლიტიკური კაპრიზით მიიღეს გადაწყვეტილება, გვესმის ცინიკური განცხადებები ღირსებასთან დაკავშირებით. ეს ღირსება კი მაშინ არ ახსენდებათ როცა მინისტრები არ მოდიან პარლამენტში. ეს არის ფარისევლობა. თავისთავად პრეზიდენტის ფიგურის შეფასება ლეგიტიმურია, მასთან მეც ბევრი პრეტენზია მაქვს, მაგრამ ეს მოხსენება ეხებოდა ქვეყანაში არსებულ ვითარებას და არა იმას, რატომ უღალატა მარგველაშვილმა ივანიშვილის. პარლამენტში გასარკვევი არაა ბიძინა ივანიშვილისა და გიორგი მარგველაშვილის ურთიერთობა. ეს გავაპროტესტეთ და დავტოვეთ სხდომა“, -განაცხადა გიგა ბოკერიამ.
ცნობისთვის, მანამდე საქართველოს პრეზიდენტმა, გიორგი მარგველაშვილმა პროტესტის ნიშნად პარლამენტის სხდომა დატოვა.
