მოწმის ჩვენებით, არც ერთი ბრალდებულის მიერ დანის გამოყენება არ დადასტურდა. მოწმეს საერთოდ არ უხსენებია, რომ კონკრეტულმა ბრალდებულმა კონკრეტულ პიროვნებას მიაყენა დანით ჭრილობა, - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
მისი განმარტებით, დღეს დაკითხული ერთ- ერთი მთავარი მოწმის ჩვენება ბრალდების მხარის სასარგებლოდ ვერ გამოდგება.
"დღეს დაიკითხა რამდენიმე მოწმე, მათ შორის, გამომძიებლები, რომლებმაც რომლებმაც დაადასტურეს მათ მიერ ჩატარებული საგამოძიებო მოქმედებების ავთენტურობა. მათ ისაუბრეს, თუ რა ვითარებაში ჩაატარეს საგამოძიებო მოქმედებები. დღეს დაიკითხა ასევე, ბრალდების მხარის ერთ-ერთი ოქროს მოწმე. ჩვენი შეფასებით, მან არ დაადასტურა ბრალდებულთა მიმართ ბრალად შერაცხული ქმედება. მისი ჩვენება პირდაპირ წინააღმდეგობაში მოდის ბრალდების დადგენილებასთან და მათ პოზიციასთან. მოწმის ჩვენებით, არცერთი ბრალდებულის მიერ დანაშაულის ჩადენის ფაქტი არ დადასტურდა. თუმცა, გარკვეულ დეტალებთან დაკავშირებით, მისი ჩვენება ნამდვილად იყო თავსებადობაში რიგი მოწმეების ჩვენებებთან. რაც შეეხება დაჭრას, დანების კუთვნილებას და ასე შემდეგ, შეგვიძლია ვთქვათ, რომ მოწმის ჩვენება არ გამოდგება ბრალდების მხარის სასარგებლოდ. მან ისაუბრა, თუ როგორ დაიწყო კონფლიქტი,როგორ მივიდნენ ადგილზე, როგორ განვითარდა და დასრულდა კონფლიქტი. თუმცა, უმნიშვნელოვანეს ფაქტობრივ დეტალებთან დაკავშირებით მისი ჩვენება კატეგორიულად ეწინააღმდეგება სხვა მოწმეთა ჩვენებებს. შეგვიძლია თამამად ვთქვათ, რომ მოწმე, რომელიც დღეს დავკითხეთ გარკვეულწილად უმნიშვნელოვანეს გარემოებებთან დაკავშირებით სრულიად განსხვავებული ინფორმაცია მიაწოდა სასამართლოს", - აცხადებს კაკაბაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
