თუ მან დანით ბავშვს ასეთი რაღაც გააკეთებინა, ჩათვალეთ, ბავშვიც ცოცხლად დამარხა, - განაცხადა "ჯი-ეიჩ-ენთან" ბარნოვზე მოკლული 25 წლის თაკო გამრეკელაშვილის მამამ, ზვიად გამრეკელაშვილმა.
ის დღეს მთავარ სამმართველოში გამომძიებლების შეკითხვებს თითქმის, 2 საათის განმავლობაში პასუხობდა.
გამრეკელაშვილი ვარაუდობს, რომ მისი შვილის მკვლელობაში ბრალდებულმა მცირეწლოვან ბავშვს დედის მკვლელობაში მონაწილეობა მიაღებინა.
"ბავშვი სიმართლეს იტყვის, ოღონდ დალაგებული გონებით, ორივე ბავშვთან ფსიქოლოგები მუშაობენ. სავარაუდოდ, ბავშვს, დანას, მკვლელსა და მიცვალებულს ერთმანეთთან კავშირი ჰქონდათ. რა ვითარებაში, ვინ რა მოქმედებას ასრულებდა, ეს არ ვიცი. თუ მან დანით ბავშვს ასეთი რაღაც გააკეთებინა, ჩათვალეთ, ბავშვიც ცოცხლად დამარხა. ეს საშინელებაა! მინდა, რომ ამაზე ექსპერტიზამ, ფსიქოლოგებმა და გამოძიებამ გასცეს პასუხი. ეს მხოლოდ მე კი არ მაინტერესებს, მთელ საზოგადოებას აინტერესებს. დაველოდოთ, გამოძიების შედეგებს, მინდა, რომ ჩემი შვილის მხარეს იყოს სამართალი. იმედი მაქვს, გამოძიება სამართლიანი იქნება. ჩვენ უვადო პატიმრობას მოვითხოვთ. ისეთი მძიმე მხარეებია, რომელთა ერთმანეთზე შეფარდებითაც მას უვადო პატიმრობა უნდა მიესაჯოს", - აცხადებს გამრეკელაშვილი.
კითხვაზე, იყო თუ არა მისთვის ცნობილი, რომ ბრალდებული მის ყოფილ მეუღლესა და შვილზე ძალადობდა, პასუხობს, რომ იცოდა.
"რა თქმა უნდა, ცნობილი იყო. მუქარა, ზეწოლა იყო, ბევრი რამე ვიცოდი, მესმოდა, მაგრამ მკვლელობამდე თუ რამე, ან ვინმე მიიყვანდა ამ საქმეს, ვერასდროს წარმოვიდგენდი. მკვლელობაში ბრალდებული ფსიქოლოგიურად არეულია, მის გარშემო გამოძიება მხოლოდ ერთი და ორი წლის წინ მომხდარ ამბებზე კი არ მუშაობს, არამედ, 5 და 10 წლის უკან განვითარებულ მოვლენებზე. გამოკვლევა ძირფესვიანად დაიწყეს. ყველაფერი მის წინააღმდეგ მიდის, რაც მას ბრალს უმძიმებს", - დასძენს გამრეკელაშვილის მამა.
შეგახსენებთ, მკვლელობაში ბრალდებულ ბაქრაძეს ბრალდება წარდგენილი აქვს საქართველოს სისხლის სამართლის კოდექსის 11 პრიმა 109-ე მუხლის მესამე ნაწილის "ბ" ქვეპუნქტით, რაც გულისხმობს ოჯახის ერთი წევრის მიერ, მეორე წევრის განზრახ მკვლელობას განსაკუთრებული სისასტიკით ჩადენილს. დანაშაული სასჯელის სახედ და ზომად 16-დან 20 წლამდე, ან უვადო თავისუფლების აღკვეთას ითვალისწინებს.
