დღეს, 18:30 საათზე ბათუმში ანგისის სპორტული ბაზის საზეიმო გახსნის ღონისძიება გაიმართება. გახსნის ცერემონიალს აჭარის მთავრობის, უმაღლესი საბჭოს, ბათუმის მერიისა და საკრებულოს, საქართველოს ფეხბურთის ფედერაციისა და საფეხბურთო კლუბ ,,დინამო ბათუმის“ წარმომადგენლები დაესწრებიან.

ანგისის სპორტული ბაზა 78 772 კვ.მ ტერიტორიას მოიცავს.

პროექტის ფარგლებში მოეწყო 1575 მაყურებელზე გათვლილი ტრიბუნა, რომელიც შედგება 5 სექტორისა და შშმ პირთათვის განკუთვნილი სპეციალური ადგილებისგან. ბაზას აქვს ბუნებრივსაფარიანი და ხელოვნურსაფარიანი მოედნები.

აშენებულია 3 სართულიანი შენობა, მეოთხე სართულზე კი მოწყობილია ტერასა მედია საშუალებებისათვის. მეოთხე სართულზე, ორ დაშენებაში მოთავსებულია მართვის სისტემები. შენობაში განთავსებულია ბაზის ადმინისტრაცია, გასახდელები, საშხაპეები, სავარჯიშო დარბაზები, სამედიცინო ოთახი. ობიექტი შშმ პირთათვის ადაპტირებულია.

მშენებლობა 2017 წლის 25 დეკემბერს დასრულდა. სამუშაოების ღირებულება - 4 მილიონ 116 ათას 170 ლარი.