დღეს დავკითხეთ ექსპერტი, რომელმაც დაადასტურა ექპერტიზის დასკვნის ავთენტურობა და დღეს კიდევ ერთხელ უტყუარად დადგინდა, რომ ჩემი დაცვის ქვეშ მყოფის მფლობელობაში არსებული დანით მომაკვდინებელი ჭრილობა არ არის მიყენებული, - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
მისი განმარტებით, დღეს დაკითხულმა მოწმემ სხვა მოწმეებისგან განსხვავებული ჩვენება მისცა.
"დღეს ასევე დავკითხეთ სხვა პირი, რომელიც შეესწრო ჩხუბს. ამ მოწმის ჩვენება, ისევე როგორც ბრალდების მხარის ყველა თვითმხილველი მოწმის ჩვენება, წინააღმდეგობაშია ერთმანეთთან. დღევანდელი მოწმის ჩვენება გამორიცხავს სხვა მოწმეთა ჩვენებებს, მათ შორის დაჭრის თვითმხილველი მოწმეების ჩვენებებს. მოწმეები ჩვენ შეგვიძლია გავყოთ ორ კატეგორიად: ერთი ჩხუბში მონაწილე პირები და მეორე, პირები, რომლებიც უბრალოდ შემთხვევით შეესწრნენ ფაქტს. ორივე კატეგორიის მოწმეთა ჩვენებები აბსოლუტურად გამორიცხავს ერთმანეთს, თითქმის ყველა ფაქტობრივ გარემოებასთან დაკავშირებით", - აცხადებს კაკაბაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
