"მოწმემ პირდაპირ დაინახა, თუ როგორ გამოწია ხელი ერთ-ერთმა ბრალდებულმა გარდაცვლილის გულ-მკერდის არედან და რომ მას ეჭირა ვერცხლისფერი საგანი", - განაცხადა ხორავას ქუჩაზე მომხდარი მკვლელობის საქმის პროკურორმა, ზვიად ფხაკაძემ.
დღევანდელ სასამართლო სხდომაზე დაიკითხა სამედიცინო ექსპერტი და ხორავას ქუჩაზე მომხდარი სისხლიანი გარჩევის თვითმხილველი.
"დავკითხეთ ექსპერტი, რემელმაც ისაუბრა გარდაცვლილზე არსებული დაზიანებების თაობაზე, თუ რამდენი ჭრილობა იყო და ისაუბრა იმ შესაძლებლობებზე, თუ რომელი დანით იყო შესაძლებელი აღნიშნული დაზიანებების მიყენება. აქედან გამომდინარე, ჩვენ შეგვიძლია ცალსახად ვთქვათ, რომ კომპლექსური ექსპერტიზის დასკვნა, აბსოლუტურ თანხვედრაშია საქმეში არსებულ სხვა მტკიცებულებებთან, რომელიც გამოკვლეული იყო სასამართლო სხდომაზე. კერძოდ, ვგულისხმობ სხვა ექსპერტიზის დასკვნებს, მათ შორის გენეტიკური ექსპერტიზის დასკვნებს. ექსპერტიზის დასკვნები სრულ თანხვედრაშია საქმეზე დაკითხულ მოწმეთა ჩვენებთან და სხვა მტკიცებულებებთან.
დღეს ასევე დაიკითხა ფაქტის თვითმხილველი მოწმე, რომელიც შემთხვევის ადგილთან ახლოს ცხოვრობს. მან ისაუბრა იმაზე, თუ რა ვითარებაში მოხდა ერთ-ერთი ბრალდებულის მხრიდან, ერთ-ერთ გარდაცვლილზე დანით ზემოქმედება. მან პირდაპირ დაინახა თუ როგორ გამოწია ხელი ერთ-ერთმა ბრალდებულმა გარდაცვლილის გულ-მკერდის არედან და რომ მას ეჭირა ვერცხლისფერი საგანი. მოწმემ განაცხადა ასევე, რომ გარდა ბრალდებულისა და გარდაცვლილებისა, სხვა პირებზე სისხლის ლაქები არ შეუნიშნავს", - აცხადებს ფხაკაძე.
როგორც ფხაკაძე აღნიშნავს, დღეს დაკითხულ მოწმეს არ დაუდასტურებია წითელ მანქანაში მჯდომმა მძღოლმა დაინახა თუ არა დაჭრის ფაქტი.
"მოწმემ აღნიშნა რომ დაინახა წითელი ფერის მანქანა და მძღოლი, შემთხვევის ადგილზე თუმცა მან ვერ ისაუბრა იმაზე, დაინახა თუ არა ამ მძღოლმა ჩხუბი ან დაჭრის ფაქტი. ხსენებული მანქანის მძღოლი დაკითხულია სასამართლოში და მან თავისი პოზიცია დააფიქსირა", - განაცხადა პროკურორმა.
ცნობისთვის, 2017 წლის პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
