ამერიკის შეერთებული შტატების საერთაშორისო განვითარების სააგენტოს (USAID) პროექტ Zrda-ს ინიციატივით და ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის მხარდაჭერით ტურიზმის სექტორის წარმომადგენლებისთვის ერთდღიანი სემინარი ჩატარდა თემაზე - ახალი ტურისტული პროდუქტის შექმნა და წარმატებით გაყიდვა.
სემინარს ცნობილი ბრიტანელი მარკეტოლოგი ჯეკ დელფი უძღვებოდა, რომელსაც მრავალწლიანი პრაქტიკული გამოცდილებან აქვს ევროპის ქვეყნებში ტურიზმის განვითარების და ახალი ტურისტული პროდუქტების განვითარების კუთხით.
სემინარი მოიცავდა ტურისტული ბაზრის განვითარებისთვის ისეთ მნიშვნელოვან საკითხებს, როგორიცაა ბაზრის, მოთხოვნისა და მომხმარებლის განსაზღვრა; ბრენდი, ტრენდები და კონკურენცია; სოფლის, აგრო, სათავგადასავლო და ღვინის ტურიზმი და სოფლისა და მეწარმეთა ჩართულობის მნიშვნელობა; პროდუქტის წარმოება და ა. შ. ტურიზმის ეროვნული ადმინისტრაცია და USAID-ის პროექტი Zrda ერთობლივად მუშაობს ტურიზმის განვითარების, ტურისტული პროდუქტების, ახალი ტურისტული მარშრუტებისა და ღირშესანიშნავი ადგილების პოპულარიზაციის მიზნით. ამ თანამშრომლობის მიზანია ტურიზმის სფეროში მომუშავე კომპანიების ხარისხის საერთაშორისო სტანდარტებთან დაახლოვება.
USAID-ის მიერ დაფინანსებული პროექტი ზრდა არის ხუთწლიანი პროგრამა, რომელიც მიზნად ისახავს მდგრადი ეკონომიკური განვითარების ხელშეწყობას საქართველოს ხუთი რეგიონის 81 თემში. ზემოაღნიშნულის მისაღწევად, პროექტი განახორციელებს შემდეგ ინიციატივებს: მიკრო, მცირე და საშუალო საწარმოების განვითარება; სოფლის მეურნეობის შემოსავლების ზრდის ხელშეწყობა; მეწარმეებსა და მყიდველებს შორის საბაზრო ურთიერთობების ჩამოყალიბება და განვითარება; ადგილობრივი ეკონომიკური განვითარების ხელშეწყობა ბიზნესკავშირების დამყარებისა და გაძლიერების მეშვეობით.
დამატებითი ინფორმაციისათვის ეწვიეთ: https://www.facebook.com/zrda.ge; www.zrda.ge. USAID-ის საქმიანობის შესახებ საქართველოში: უკანასკნელი 25 წლის განმავლობაში ამერიკელმა ხალხმა USAID-ის საშუალებით 1.5 მილიარდ აშშ დოლარზე მეტი თანხის ინვესტიცია განახორციელა საქართველოში.
პროექტები, რომელთა მიზანია დახმარება გაუწიოს საქართველოს თავისუფალი და განვითარებული დემოკრატიის მშენებლობაში, მოიცავს შემდეგ მიმართულებებს: ეკონომიკური ზრდის ხელშეწყობა, დემოკრატიული ინსტიტუტების განვითარება და ჯანდაცვისა და განათლების სისტემების გაუმჯობესება.
