ევროპიდან დაბრუნებული ამერიკის მოქალაქე, აეროპორტში ვაშლის გამო დააჯარიმეს, რომელიც მგზავრმა თვითმფრინავიდან წამოიღო.
აშშ-ის შტატ კოლორადოს მცხოვრები კრისტალ ტედლოკი, რომელიც პარიზიდან ბრუნდებოდა, მინეაპოლისში სხვა რეისზე უნდა გადამჯდარიყო. სწორედ მინეაპოლისში გადაწყვიტა ქალმა ვაშლის შეჭმა, რომელიც მას ფრენისას მისცეს. თუმცა ეს აშშ-ის საბაჟოს წესების დარღვევა აღმოჩნდა.
აშშ-ში სოფლის მეურნეობის პროდუქტების შეტანა, გარკვეული საფრთხეების გამო, რიგი ქვეყნებიდან აკრძალულია. ამის გამო, აეროპორტებში საერთაშორისო რეისების მგზავრების შერჩევითი კონტროლი ხორციელდება და სწორედ ამ კონტროლისას მოხდა კრისტალ ტედლოკის „გამოვლენა“ და დაჯარიმება.
მგზავრი შეეცადა აეხსნა, რომ ვაშლი ავიაკომპანია Delta-ს საფირმო პაკეტში იყო მოთავსებული და სახიფათო არ იყო.
საბოლოოდ კრისტალ ტედლოკს, ქვეყნის საბაჟო წესების დარღვევისთვის 500 დოლარის ოდენობის ჯარიმა გამოუწერეს, რომელიც მან 20 დღის განმავლობაში უნდა დაფაროს. აღნიშნული ფაქტის გამო ის გამოეთხოვა ასევე მიმზიდველ სტატუსს Global Entry, რომელიც მგზავრს საშუალებას აძლევს საბაჟო და სასაზღვრო კონტროლი მინიმალური ფორმალობებით გაიაროს.
