ENG / RUS       12+

დიმიტრი მედოევი: პროქართულ ხელისუფლებასთან თეორიულად შესაძლებელი იქნება ახალი გვერდის გახსნა

რესპოდენტის შესახებ

ოკუპირებული ცხინვალის სეპარატისტული ხელისუფლების წარმომადგენლები 2008 წლის აგვისტოს ომის დასრულებიდან ორი წლის თავზე ქართულ-ოსურ ურთიერთობებზე საუბრობენ და აცხადებენ, რომ ეს "თეორიულად შესაძლებელია". ოსი სეპარატისტები მიიჩნევენ, რომ საქართველოს ხელისუფლება არ არის პროქართული ძალა და ასეთის მოსვლის შემთხვევაში ორ ერს შორის ახალი გვერდის გახსნა შესაძლებელია. სააგენტო "ჯი-ეიჩ-ენი" აგვისტოს ომის ორი წლისთავთან დაკავშირებით ე.წ. სამხრეთ ოსეთის ელჩს რუსეთის ფედერაციაში დიმიტრი მედოევს ესაუბრა.

_ 2008 წლის აგვისტოს ომის დასრულებიდან ორი წლისთავზე როგორ შეაფასებდით ორი წლის წინანდელ მოვლენებს?

_ ეს ძალიან ტრაგიკული გვერდია, როგორც საქართველოს ისტორიაში ასევე საქართველოსა და სამხრეთ ოსეთის ურთიერთობების ისტორიაში. თბილისის რეჟიმმა ძალიან სერიოზული დარტყმა მიაყენა ისტორიულად ძალიან ახლო ქართულ-ოსურ ორმხრივ ურთიერთობებს, რომლებიც ყოველთვის არსებობდა. ამიტომ, ამ დღეებში გავიხსენებთ ყველა ჩვენს დებსა და ძმებს, რომლებიც ყოველგვარი ბრალის გარეშე მოკლეს ბარბაროსული შეტევის შედეგად, რომელიც 7 აგვისტოდან 8 აგვისტოს ღამით.

_ რა შეიცვალა თქვენთვის განვლილი ორი წლის განმავლობაში?

_ ამ ორ წელიწადში ბევრი ცვლილება განხორციელდა _ შეიცვალა კავკასია, შეიცვალა კავკასიის რუკა, მასზე გაჩნდა ორი ახალი აღიარებული სახელმწიფო - აფხაზეთი და სამხრეთ ოსეთი. შეიცვალა გარესამყაროც. ძალიან სერიოზული პროცესები მიდის ყველა სივრცეში რომელიც გარს ერტყმის სამხრეთ ოსეთსა და აფხაზეთს.

შეიქმნა ახალი რეალობა, რომელსაც ანგარიში უნდა გაუწიოს არა მხოლოდ საქართველომ არამედ საერთაშორისო საზოგადოებამაც. პრეზიდენტმა ედუარდ კოკოითმა გააკეთა ძალიან საინტერესო და დროული განცხადება, რომ უნდა ვიფიქროთ, ორმხრივი სახელმწიფოთაშორისი ურთიერთობების დალაგებაზე საქართველოსა და სამხრეთ ოსეთს შორის. მიმაჩნია, რომ ეს ძალიან მნიშვნელოვანი განცხადებაა და მას უნდა მოუსმინოს თბილისმაც და საერთაშორისო საზოგადოებამაც.

_ ხომ არსებობს უკვე საქართველოს ხელისუფლების მიერ შემუშავებული სახელმწიფო სტრატეგია, სწორედ რომელშიც არის საუბარი ორმხრივი ურთიერთობების აღდგენაზე, სხვა და სხვა სფეროში ერთობლივი პროექტების განხორციელებაზე...

_ ჩვენ ეს ყველაფერი უკვე გავიარეთ. ძალინ ბევრი ინიციატივა მოგვისმენია რომლებიც თბილისში დაიწერა და, შესაძლოა, ოკეანის გაღმაც. ეს ბოლო როგორც აქ, რუსეთში ამბობენ თბილისში დაწერილი ფურცელი "არაფრისმომცემი ქაღალდია" და იგი თავის თავში არაფერს წარმოადგენს.

იქ არც შინაარსია და არც ადრესატია. ყველაფერი რაც დღეს შეიძლება სააკაშვილის რეჟიმმა შემოგვთავაზოს ჩვენთვის მიუღებელია.

_ აგვისტოს მოვლენები შეფასდა რუსეთის ფედერაციის მიერ მოწყობილ პროვოკაციად...

_ შესაძლოა, ქართული აუდიტორიისათვის ახლა მე ახალი რამ ვთქვა. სამწუხაროდ, ბოლო დროს ცენტრი, სადაც იბადება ყველანაირი პროვოკაცია _ არის სააკაშვილის ადმინისტრაცია.

ხანდახან გვეჩვენება კიდეც, რომ მრავალრიცხოვან ტრენინგებზე საზღვარგარეთ, მივლინებებსა და სემინარებზე მათ ასწავლიდნენ მხოლოდ იმას თუ როგორ მოაწყონ პროვოკაცია. ყოველივე ამას თვალყურს 2003 წლიდან ვადევნებთ, როდესაც ხელისუფლების სათავეში ეს ახალი გუნდი ანტიკონსტიტუციური გზით მოვიდა, მაგრამ ეს საქართველოს შიდა საქმეა, რომელშიც მე ჩარევა არ მინდა.

მაგრამ, პროვოკაციები იწყება სწორედ მაშინ, როდესაც ეს რეჟიმი მოვიდა ხელისუფლების სათავეში, მოძლიერდა ხელისუფლებაში მიიღო ძალიან ბევრი ტრანში, ფული და დახმარება საზღვარგარეთიდან. ყოველივე კი მიმართული იყო იმისაკენ, რომ განხორციელებულიყო მთავარი პროვოკაცია _ მთელი ქართული არმია სასიკვდილოდ უნდა ყოფილიყო გაგზავნილი სამხრეთ ოსეთში. ეს საქართველოს შიდა საქმეა და მე ამაში ჩარევა არ მინდა.

_ ზოგადად, რა პერსპექტივას ხედავთ ქართველ და ოს ხალხს შორის ურთიერთობების აღდგენის პერსპექტივის თვალსაზრისით?

_ არ მინდა ისეთ ადამიანად გამოვჩნდე, რომელიც გვერდიდან კარნახობს ქართველ ხალხს თუ როგორ უნდა მოიქცეს, მაგრამ მე მაქვს ჩემი საკუთარი აზრი, რომელსაც დიდი სიამოვნებით გამოვთქვამ ქართული საზოგადოების წინაშე.
მიმაჩნია, რომ როდესაც საქართველოს ხელისუფლების სათავეში მოვა არა პროდასავლური ან პროკრემლისეული, არამედ პროქართული ძალა და როდესაც ქართველი ხალხი, რომელიც დღეს ჩამოცილებულია საკუთარი ქვეყნის მმართველობას, კვლავ იქნება საკუთარი ქვეყნის მმართველი პირველი ნაბიჯებიც მაშინ გადაიდგმება.

პროქართულმა ხელისუფლებამ პირველივე ნაბიჯებით, პირველივე განცხადებებით აღიარება უნდა მოახდინოს იმ შეცდომებისა რომელიც წინა ხელისუფლებას ჰქონდა. მან უნდა მოინანიოს საკუთარ, აფხაზ და ოს ხალხთან ომები და აგრესია, რომელიც წინამორბედმა ხელისუფლებებმა განახორციელეს. ეს იქნებოდა ერთგვარი შერიგების აქტი და შერიგებისკენ გადადგმული ნაბიჯი და თეორიულად შესაძლებელი იქნება ახალი გვერდის გახსნა, რომელიც იმის მაუწყებელი იქნება, რომ აღიარებულია შექმნილი ახალი რეალობები.

ჩვენ მეზობლები ვართ, ჩვენ არსად წასვლას არ ვაპირებთ, ასევე არ ვაპირებთ ჩვენი რესპუბლიკის ტერიტორიის ჩუქებას ვინმესთვის ვაშინგტონში ან მოსკოვში - ეს ჩვენი ქვეყანაა და ჩვენ იქ ვაპირებთ ცხოვრებას და ცივილიზებული თანამედროვე და დემოკრატიული სახელმწიფოს მშენებლობას.

_ როგორ ფიქრობთ, არის საქართველოში დღეს ისეთი პოლიტიკოსები როგორებზეც თქვენ საუბრობთ?

_ რა თქმა უნდა, არიან. პირადად ვიცნობ ძალიან ბევრ მათგანს. საქართველოში არის ძალიან ბევრი ჯანსაღი ძალის წარმომადგენელი. საქართველოში არიან ჭეშმარიტი პატრიოტები თავისი ქვეყნისა, ხოლო შენი ქვეყნის პატრიოტიზმი ჩემი აზრით, სხვა ქვეყნებისა და ხალხების პატივისცემასაც ნიშნავს. თუმცა, მე ვიცი, რომ ეს ძალები დღეს საქართველოში ჩახშობილია. მათ უჭირთ თუმცა, ჩვენ ხანდახან გვესმის მათი ხმები, რაც ძალიან გვსიამოვნებს.

_ იქნებ დააკონკრეტოთ ვისზე საუბრობთ?

_ უფრო კონკრეტულად საუბარი არ შემიძლია, იმიტომ რომ მეშინია მათი ბედის, ჯანმრთელობის და სისცოცხლის გამო. იმიტომ რომ თბილისში დღეს ისეთი რეჟიმია, რომ იგი არა თუ დევნის ღიად, არამედ სრული სვლით დევნის განსხვავებულ აზრს. ამიტომაც ამ ადამიანების ვინაობას არ დავასახელებ.

"ჯი-ეიჩ-ენი", ესაუბრა ეკატერინე მომცელიძე

ავტორი: . .