თბილისის სააპელაციო სასამართლოს მოსამართლეთა კოლეგიამ დღეს შესაძლოა, სალომე ტატიშვილის საქმეზე განაჩენი გამოაცხადოს. სხდომა 13:00 საათზეა ჩანიშნული.
სალომე ტატიშვილს სრიალისას 18 წლის გიორგი ლიპარტელიანი დაეჯახა. ის პირველი ინსტანციის სასამართლომ უდანაშაულოდ ცნო.
ბრალდების მხარემ სააპელაციო სასამართლოში, თბილისის საქალაქო სასამართლოს მიერ, გიორგი ლიპარტელიანის მიმართ გამოტანილი გამამართლებელი განაჩენი გაასაჩივრა.
ბრალდების მხარის განცხადებით, გიორგი ლიპარტელიანი თავიდანვე დიდი სიჩქარით ძალიან სწრაფად დაეშვა და თვლიან, რომ საქალაქო სასამართლოს მოსამართლემ, ბესიკ ბუგიანიშვილმა უსაფუძვლო განაჩენი გამოიტანა.
დაცვის მხარე კი აცხადებს, რომ ბრალდების მხარემ სასამართლოში ბრალდების დამადასტურებელი უტყუარი მტკიცებულებების წარმოდგენა ვერ შეძლო. ლიპარტელიანის ადვოკატის, თენგიზ ხარებავას განმარტებით, ლიპარტელიანი სრიალისას მთვრალ მდგომარეობაში არ ყოფილა. მისი თქმით, ლიპარტელიანმა და მისმა მეგობრებმა გზაში პატარა კონიაკი იყიდეს და 100 გრამი დალიეს. ადვოკატი ხარებავა თავის შესავალ სიტყვაში აცხადებდა, რომ გიორგი ლიპარტელიანი არავის გაუფრთხილებია, რომ სასრიალო ტრასაზე ბავშვები სრიალებდნენ და იქ არც რაიმე გამაფრთხილებელი ნიშანი ყოფილა, რომ სრიალი შეზღუდული იყო.
ადვოკატის თქმით, ლიპარტელიანმა წაქცევის შედეგად გონება დაკარგა და დეტალები არ ახსოვს. ის წაქცევის შემდეგ განვითარებულ მოვლენებს დღემდე ვერ იხსენებს.
სასამართლო განხილვებს თავად ლიპარტელიანი არ დასწრებია. როგორც სასამართლო სხდომაზე მისმა ადვოკატმა განაცხადა, ლიპარტელიანი ჩეხეთში სწავლობს და ის მისი ინტერესების დაცვა ადვოკატებს ანდო.
ცნობისთვის, 12 წლის სალომე ტატიშვილს 2016 წლის 10 იანვარს გუდაურში, სრიალისას, თხილამურებზე მდგომი 18 წლის გიორგი ლიპარტელიანი დაეჯახა. მოზარდი სიცოცხლისთვის შეუთავსებელი ტრავმებით ადგილზე გარდაიცვალა, თავად ლიპარტელიანმა კი, მსუბუქი დაზიანებები მიიღო. ტატიშვილის გაურთხილებლობით სიცოცხლის მოსპობაში ბრალდებული, ლიპარტელიანი 2017 წლის 29 დეკემბერს თბილისის საქალაქო სასამართლომ უდანაშაულოდ ცნო. აღნიშნული გადაწყვეტილება მოსამართლე ბესიკ ბუგიანიშვილმა მიიღო.
