დავინახე, რომ ერთი მოზარდი იდგა და ჩაიკეცა. ეს იყო დავით სარალიძე, - განაცხადა ჟურნალისტებთან პროცესის დაწყების წინ, ხორავას ქუჩაზე მოზარდებს შორის მომხდარი დაპირისპირების თვითმხილველმა, თამარ გოცირიძემ.
ის იმ კორპუსის მეხუთე სართულზე ცხოვრობს, რომლის წინაც მოზარდებს შორის დაპირისპირება მიმდინარეობდა.
"როცა ხმაური შემომესმა, გავედი აივანზე. ჩემი აივანი მეხუთე სართულზეა, დავინახე რომ ბავშვები უკვე "არკიდან" გადიოდნენ. მეგონა რომ უკვე ყველაფერი დამთავრებული იყო. თუმცა, ორ მოზარდს შორის მოხდა ჩხუბი, თითქოს, ერთმანეთს მუშტებს ურტყამდნენ. მაინტერესებდა კიდევ თუ რამე ხდებოდა, უკვე დავიყვირე, ტელეფონი ავიღე რომ სადღაც დამერეკა, რა დროსაც დავინახე, რომ ერთი მოზარდი იდგა და ჩაიკეცა. ეს იყო დავით სარალიძე. მას ვისთან ჰქონდა კონფლიქტი ვერ დავინახე, მე დავინახე, რომ იდგა, რამდენიმე ნაბიჯი გადადგა და მაშინ ჩაიკეცა. მაშინ მივხვდი რომ რთულად იყო საქმე", - აცხადებს მოწმე.
კითხვაზე დაინახა თუ არა, მან დანა ვის ჰქონდა, ამბობს, რომ მეხუთე სართულიდან მხოლოდ სილუეტებს ხედავდა. ამ წუთებში, თბილისის საქალაქო სასამართლოში აღნიშნული მოწმის დაკითხვა მიმდინარეობს.
