რუსულ ავიაკომპანიებს მგზავრთა რეგისტრაციის შეწყვეტა 1 საათით ადრე სურთ. როგორც რუსული მედია წერს, უმსხვილესმა რუსულმა ავიაკომპანიებმა უკვე მიმართეს ტრანსპორტის სამინისტროს, რათა ავიაგადამზიდავებს უფლება მიეცეთ მგზავრთა რეგისტრაცია ფრენამდე 60 წუთით ადრე შეწყდეს. დღეს არსებული ნორმებით კი ეს ვადა - 40 წუთითაა განსაზღვრული.
თავდაპირველად აღნიშნული ინიციატივით Aeroflot-ი გამოვიდა, ხოლო შემდეგ მას მხარი S7-მაც დაუჭირა.
ავიაკომპანიები მიიჩნევენ, რომ ამ ქმედებით თავიდან იქნება აცილებული დაგვიანებები, მით უმეტეს დატვირთულ აეროპორტებში.
ავიაკომპანიების ინიციატივას მალე სახელმწიფო დუმაში განიხილავენ და გადაწყვეტილება ამის შემდეგ იქნება მიღებული.
ექსპერტები აცხადებენ, რომ მგზავრები აღნიშნულ ინიციატივას საკმაოდ ნეგატიურად შეხვდებიან.
უნდა აღინიშნოს, რომ მსოფლიო ავიაცია მიმართულია იმისკენ, რომ რეგისტრაციის შეწყვეტის დრო პირიქით შეამციროს, თუმცა რუსებს განსხვავებული „აზრი“ აქვთ.
