სასტუმროების ფასების ინდექსი 2018 წლის მარტში, თებერვლის თვესთან შედარებით, 6.4%-ით გაიზარდა.  როგორც  Policy and Management Consulting Group-ის (PMCG) მიერ გამოქვეყნებულ ინფორმაციაშია აღნიშნული, სასტუმროების სტანდარტული ორ ადგილიანი ნომრების ფასები ყველაზე მეტად დედაქალაქში გაიზარდა (11.5%-ით), ფასები ყველაზე მეტად შემცირდა მცხეთა-მთიანეთის რეგიონში (5.4%-ით).

აღსანიშნავია, რომ მარტში, თებერვალთან შედარებით, საერთაშორისო ვიზიტორების რაოდენობა 31%-ით გაიზარდა, ხოლო 24 საათით და მეტი დროით (ტურისტი) საქართველოში 64%-ით მეტი საერთაშორისო ვიზიტორი გაჩერდა.

3, 4 და 5 ვარსკვლავიანი სასტუმროების ფასების ინდექსი 2018 წლის მარტში, თებერვალთან შედარებით, 9%-ით გაიზარდა. ამ ტიპის სასტუმროებში ფასები ყველაზე მეტად გაიზარდა თბილისში და აჭარაში. 3-ვარსკვლავიან სასტუმროთა სტანდარტული 2-ადგილიანი ნომრის ფასები, წინა თვესთან შედარებით, ყველაზე მეტად შემცირდა მცხეთა-მთიანეთში.

საოჯახო ტიპის სასტუმროების ფასების დონე 2018 წლის მარტში თებერვალთან შედარებით 2.2%-ით შემცირდა. რეგიონების მიხედვით, ფასები ყველაზე მეტად სამცხე-ჯავახეთში შემცირდა.