18 აპრილს, 12:00 საათზე, დაბა აგარიდან "აგარის შაქრის" თანამშრომლები თბილისის მიმართულებით მსვლელობას დაიწყებენ, რომლის ბოლო წერტილიც საქართველოს მთავრობის კანცელარიის შენობა იქნება.
ამის შესახებ განცხადებას "საქართველოს პროფკავშირები" ავრცელებს.
"ექვს თვეზე მეტია აგარის შაქრის საწარმო გაჩერებულია. უკვე ორმოცი დღეა, რაც აგარელი მშრომელები, "აგარის შაქრის" კომპანიის პირველადი პროფკავშირის და სოფლის მეურნეობის, მსუბუქი, კვებისა და გადამამუშავებელი მრეწველობის მუშაკთა პროფკავშირის ორგანიზებით, ღია ცის ქვეშ, 24 საათიან რეჟიმში საპროტესტო აქციას მართავენ.
კომპანია ყველაფერს იმპორტული შაქრის დაბალ ფასსა და პროდუქციის ჭარბ შემოდინებას აბრალებს, საკუთარ პასუხიმგებლობას იხსნის და ხელისუფლებისაკენ იშვერს თითს.
ხელისუფლება დღემდე არ დგამს ქმედით ნაბიჯებს, რომლებსაც ამ პრობლემის რეალურად მოგვარების ძალა შესწევს. სახეზე გვაქვს მხოლოდ პროტესტის მაქსიმალური მინელების მიზნით, არაშედეგობრივი დისკუსიების წამოწყების მცდელობა ისეთ ჯგუფებთან, რომლებიც გადაწყვეტილების მიმღებ სუბიექტებს არ წარმოადგენენ.
აგარის მოსახლეობა დღეს არის გაუსაძლის კრიზისში, როგორც ეკონომიკურად, ისე სოციალურად. ყველა დასაქმებულის უკან დგას ოჯახი და სამწუხაროდ თითოეულ მათგანს გააჩნია საბანკო ვალდებულებები.
აღნიშნული პროტესტის მთავარ მამოძრავებელ ძალას წარმოადგენს საქართველოს სოფლის მეურნეობის, მსუბუქი, კვებისა და გადამამუშავებელი მრეწველობის მუშაკთა დამოუკიდებელი პროფესიული კავშირი. შესაბამისად აღნიშნული პროფკავშირი სრულად იღებს პასუხისმგებლობას მომავალში პროცესების განვითარებაზე", - ნათქვამია განცხადებაში.
