"კატეგორიულად შემიძლია განვაცხადო, რომ მოწმე დაშინებული და ზეწოლის ქვეშ იყო, სწორედ ამან განაპირობა ის რომ მან წინა სხდომაზე მიცემული ჩვენება შეცვალა", - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
მისი განმარტებით, მოწმემ ზეწოლას ვერ გაუძლო და სწორედ,ამის შედეგად შეცვალა მან დღეს სასამართლო სხდომაზე ჩვენება.
"აღნიშნულმა პირმა წინასასამართლო სხდომაზე ბრალდების მხარის საწინააღმდეგო ჩვენება მისცა. მან თავის ჩვენებით ფაქტობრივად გამორიცხა ბრალდების დადგენილებაში მითითებული ფაქტები და გარემოებები. რა თქმა უნდა, ჩვენ გვქონდა მოლოდინი, რომ ამ ჩვენების შემდეგ მასზე სერიოზული ზეწოლა განხორციელდებოდა, ამასთან დაკავშირებით ჩვენ არაერთი განცხადება გავაკეთეთ და ვამბობდით, რომ ის ამ ზეწოლას ვერ გაუძლებდა. მიზეზს, თუ რატომ შეცვალა მოწმემ ჩვენება, ამასთან დაკავშირებით მას არადამაჯერებელი არგუმენტები აქვს. ჩვენი მოსაზრებით, ბრალდების მხარეს უბრალოდ არ მოეწონა მისი ჩვენება, ვინაიდან საბრალდებო დასკვნაში მითითებული გარემოებებს ეწინააღმდეგებოდა. მოწმეზე მთელი ორი დღის განმავლობაში განახორციელეს ზეწოლა და მიაღწიეს იმას, რომ ამ მოწმემ ჩვენება შეცვალა. საზოგადოებამ თავად განსაჯოს, თუ როგორ ხდება ჩვენთან საქმეების გამოძიება და როგორ ხდება მოწმეზე ზემოქმედების მოხდენა",- განაცხადა კაკაბაძემ.
ცნობისთვის, დღეს, დაცვის მხარემ ბრალდების მხარის ერთ-ერთ მნიშვნელოვანი მოწმის, მიხეილ კალანდიას დაკითხა დაიწყო. ის წინა ხდომაზე ბრალდების მხარემ დაკითხა. არსებული ინფორმაციით, მოწმემ პროცესზე განაცხადა, რომ გამოძიების ეტაპზე მას ჩვენება ზეწოლის შედეგად მიაცემინეს, მამამისს - თენგიზ კალანდიას კი, რომელიც დანაშაულის შეუტყობინებლობისთვისაა დაკავებული და შსს-ს ყოფილი თანამშრომელია, სამართალდამცავები ფიზიკურად გაუსწორდნენ. ბრალდებულების ადვოკატების და დაზარალებულის განცხადებით, აღნიშნული მოწმის ჩვენებამ ბრალდების მხარის პოზიცია თავდაყირა დააყენა. მოკლულ დავით სარალიძის მამა, ზაზა სარალიძე აღნიშნავს, რომ კალანდიას ჩვენებამ საგამოძიებო ორგანოს დიდი დარტყმა მიაყენა და „ვიღაცა რაღაცას ისე აკეთებს, რომ როგორც თვითონ აწყობს, ისე დალაგდეს ყველაფერი“. ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
