"ეს ინფორმაცია არ შეესაბამება სიმართლეს, დაკითხულ მოწმესთან დარბაზიდან გამოსვლის შემდეგ კომუნიკაცია არ მქონია", - ასე გამოეხმაურა "ჯი-ეიჩ-ენთან" ხორავას ქუჩაზე მომხდარი მკვლელობის საქმის პროკურორი ზვიად ფხაკაძე გუშინ გავრცელებულ ინფორმაციას, რომ მოწმე მიხეილ კალანდიას სახლში ყოფილმა პროკურორმა და ბიძამ, მირზა სუბელიანამა ორ პროკურორთან ერთად მიაკითხა.
არსებული ინფორმაციით, კალანდიაზე ზეწოლის და სასურველი ჩვენების მიღების მიზნით, ის ბიძამ წაიყვანა. დაზარალებულ ზაზა სარალიძის ვარაუდით, კალანდია დღევანდელ პროცესზე პროკურატურის სასარგებლოდ შეცვლის ჩვენებას.
ცნობისთვის, დღეს, დაცვის მხარე ბრალდების მხარის ერთ-ერთ მნიშვნელოვან მოწმეს, მიხეილ კალანდიას დაკითხავს. ის წინა სხდომაზე ბრალდების მხარემ დაკითხა. არსებული ინფორმაციით, მოწმემ პროცესზე განაცხადა, რომ გამოძიების ეტაპზე მას ჩვენება ზეწოლის შედეგად მიაცემინეს, მამამისს - თენგიზ კალანდიას კი, რომელიც დანაშაულის შეუტყობინებლობისთვისაა დაკავებული და შსს-ს ყოფილი თანამშრომელია, სამართალდამცავები ფიზიკურად გაუსწორდნენ. ბრალდებულების ადვოკატების და დაზარალებულის განცხადებით, აღნიშნული მოწმის ჩვენებამ ბრალდების მხარის პოზიცია თავდაყირა დააყენა. მოკლულ დავით სარალიძის მამა, ზაზა სარალიძე აღნიშნავს, რომ კალანდიას ჩვენებამ საგამოძიებო ორგანოს დიდი დარტყმა მიაყენა და „ვიღაცა რაღაცას ისე აკეთებს, რომ როგორც თვითონ აწყობს, ისე დალაგდეს ყველაფერი“.
ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს.
სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა.
პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
