"აუდიტის სამსახურის თანამშრომლის ჩვენებით, სახელმწიფო დაცვის სპეციალური სამსახურის მიერ თანხები არამიზნობრივად იხარჯებოდა და ის შეუსაბამო იყო საქართველოს კანონმდებლობასთან", - განაცხადა ე.წ. პიჯაკების საქმის პროკურორმა, ქეთევან ჩაჩავამ.
დღევანდელ პროცესზე აუდიტის სამსახურის თანამშრომელი დაიკითხა.
"სასამართლო სხდომაზე დაიკითხა აუდიტის სამსახურის თანამშრომელი. შესწავლილ იქნა სახელმწიფო დაცვის სპეციალური სამსახურის 2009-2013 წლის ხარჯების მიზნობრიობა. მისი დასკვნით სახელმწიფო სპეციალური დაცვის სამსახურის უფროსის, თეიმურაზ ჯანაშიას და საქართველოს ყოფილი პრეზიდენტის, მიხეილ სააკაშვილის მიერ 9 მილიონ ლარზე მეტი ოდენობის თანხა არამიზნობრივადაა გაწეული.
მათ მიერ უკანონოდ, საქართველოს კანონმდებლობის უხეში დარღვევით ხდებოდა აღნიშნული ხარჯების გაწევა პირადი კომფორტისათვის, ტრანსპორტის, სასტუმრო მომსახურების, სამგზავრო ბილეთებისთვის, რომელიც გაიწეოდა არა მხოლოდ საქართველოს ყოფილი პრეზიდენტის პირადი კომფორტისათვის არამედ, მისი სტუმრებისათვის, ასევე სხვადასხვა ფიზიკური პირებისათვის. ჯამში აღნიშნული თანხა 9 მილიონ ლარზე მეტს შეადგენს. ფინანსისტების დასკვნის თანახმად, ხარჯები საბიუჯეტო კოდექს არ შეესაბამებოდა", - განაცხადა ჩაჩავამ.
ცნობისთვის, მიხეილ სააკაშვილსა და თეიმურაზ ჯანაშიას, სახელმწიფო ბრალდება საბიუჯეტო თანხების დიდი ოდენობით ჯგუფურად გაფლანგვას ედავება.
