თბილისის სააპელაციო სასამართლოში საქართველოს ყოფილი პრეზიდენტის, მიხეილ სააკაშვილის სასმართლო პროცესი დასრულდა.
დაცვის მხარე დღეს შესავალ სიტყვას 5 საათის განმავლობაში კითხულობდა.
"შესავალ სიტყვაში ყურადღება გავამახვილეთ ყველა იმ უკანონობაზე, რომელიც ასახული იყო გიორგი არევაძის მიერ მიღებულ გადაწყვეტილებაში, ასევე მის შეუსაბამობაზე ევრო სასამართლოს პრეცედენტულ სამართალთან და მოვითხოვეთ რომ გამამართლებელი განაჩენი იყოს მიღებული, ვინაიდან სხვა კანონიერი შესაძლებლობა ამ შემთხვევაში სასამართლოს არ აქვს", - განაცხადა სააკაშვილის ადვოკატმა, დავით კაკოიშვილმა.
ცნობისთვის, მიხეილ სააკაშვილს სანდრო გირგვლიანის მკვლელობის საქმეზე სამსახურეობრივი უფლებამოსილების ბოროტად გამოყენებას ედავებიან. აღნიშნულ საქმეზე მის მიმართ, საქალაქო სასამართლოს მოსამართლემ, გიორგი არევაძემ გამამტყუნებელი განაჩენი 3 იანვარს გამოიტანა.
სწორედ აღნიშნული გადაწყვეტილება გაასაჩივრა მან სააპელაციო სასამართლოში. შემდეგი პროცესი 3 მაისს, 14:00 საათზე ჩაინიშნა.
