„ცალსახად ვაცხადებ, რომ მოწმეების მიერ, სასამართლოზე დაფიქსირებული ინფორმაცია, მათ მიერ გამოძიების სტადიაზე გამოკითხვისას მიცემულ ინფორმაციას შეესაბამება“, - აცხადებს ხორავას ქუჩაზე მოზარდების მკვლელობის საქმის პროკურორი ზვიად ფხაკაძე.
მისი განმარტებით, დღეს გამოკითხულმა მოწმეებმა იმ ფაქტობრივ გარემოებებზე ისაუბრეს, რასაც ინციდენტის დროს შეესწრნენ.
„ბრალდების მხარის მიერ ორი მოწმე დაიკითხა, რომლებმაც ისაუბრეს 2017 წლის პირველ დეკემბერს, ხორავას ქუჩაზე მომხდარი ფაქტობრივი გარემოებების შესახებ. თითოეულმა მოწმემ ისაუბრა იმ მოცულობით, რა მოცულობითაც დაინახეს ეს ფაქტობრივი გარემოებები.
რაც შეეხება იმას, რომ თითქოს მოწმეები ჩვენებებს ცვლიან, კიდევ ერთხელ შემიძლია გითხრათ, რომ შეუძლებელია მოწმემ სიტყვასიტყვით, ზედმიწევნით გაიმეოროს ის ინფორმაცია, რა ინფორმაციაც გამოძიების დროს, გამოკითხვისას დააფიქსირეა. მოწმის ჩვენება არის ის ინფორმაცია, რომელსაც სასმართლო სხდომაზე, ფიცის დადების შემდეგ მიაწვდის სასამართლოს. შესაბამისად, ცალსახად ვაცხადებ, რომ მოწმეების მიერ, სასამართლოზე დაფიქსირებული ინფორმაცია მათ მიერ გამოძიების სტადიაზე გამოკითხვისას მიცემულ ინფორმაციას შეესაბამება. ჩვენების დაზუსტება, ჩვენების შეცვლისგან უნდა განვასხვაოთ“, - აღნიშნავს ფხაკაძე.
რაც შეეხება ექსპერტიზას, მისი განმარტებით, თუ როდის და რა შედეგებს დადებენ ექპერტები, ეს მისთვის უცნობია.
„ექსპერტიზას რაც შეეხება, ბრალდების ხმარეს ინფორმცაია არ აქვს, თუ რომელი ექსპერტი ატარებს საქსპერტო კვლევას, რა მეთოდების გამოყენებით ხდება საექსპერტო კვლევა, რამდენი ექსპერტი მონაწილეობს და ა.შ. დეტალებთან დაკავშირებით, ინფორმაცია არ გაგვაჩნია. ერთი რამ ვიცით, რომ ექსპერტიზა ლევან სამხარაულის სახელობის ექსპერტიზის ეროვნულ ბიუროში ტარდება. მიღებული შედეგების შესახებ ჩვენთვის ცნობილი არ არის“, - დასძენს ფხაკაძე.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
