თბილისის საქალაქო სასამართლოში გრძელდება ხორავას ქუჩაზე მომხდარი მკვლელობის საქმის განხილვა.
დღევანდელ სხდომაზე ბრალდების ორი მოწმე დაიკითხება. როგორც ჟურნალისტებთან საუბარში ერთ-ერთი ბრალდებულის ადვოკატი, ტარიელ კაკაბაძე აცხადებს, ბრალდების მხარის მიერ ნათქვამი, რომ მოწმის სახით დაკითხულ პირს გარდაცვლილთან ჰქონდა შემხებლობა და ამის გამო აღმოჩნდა მის ტანსაცმელზე სისხლი, სიმართლეს არ შეესაბამება.
"ბრალდების მხარე ამბობს, რომ ამ პირს ჰქონდა შემხებლობა გარდაცვლილთან და თითქოს ამიტომ გადავიდა სისხლის მის ტანსაცმელზე, მაგრამ მე შემიძლია გითხრათ, რომ ეს არ შეესაბამება სიმართლეს. მისი ჩვენებით გამოირიცხება, რომ დაჭრილ გარდაცვლილთან შეხება ჰქონდა. ჩნდება ლოგიკური შეკითხვა: თუ შეხება არ ჰქონია რეალურად დაჭრილ ადამიანთან, როგორ გადავიდა მის ტანსაცმელზე ამდენი სისხლი. რა თქმა უნდა, ბრალდების მხარე ამ კითხვებს ვერანაირად ვერ უპასუხებს, ეს კითხვა დარჩება ღიად, მაგრამ მიგვაჩნია, რომ მოწმეებისა და ბრალდებულების დაკითხვის შემდეგ ყველა ამ კითხვას პასუხი გაეცემა", - აცხადებს კაკაბაძე.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
