ამ წუთებში, იუსტიციის უმაღლეს საბჭოსთან დავით როსტომაშვილის ცემასა და თავდასხმაში ერთ-ერთი მსჯავრდებულის, ზურაბ ქუთელიას ოჯახის წევრები და ახლობლები აქციას მართავენ. ისინი თბილისის საქალაქო სასამართლოს მოსამართლის, ნათია გუდაძის მიერ ქუთელიას მიმართ გამამტყუნებელი განაჩენის გამოტანას აპროტესტებენ. აღნიშნულის შესახებ „ჯი-ეიჩ-ენს“ ქუთელიას ადვოკატმა, გიორგი ბარდაველიძემ განუცხადა.
„მოსამართლე ნათია გუდაძის მიერ მიღებულ უკანონო განაჩენს ვაპროტესტებთ. მოვითხოვთ, აღნიშნული განაჩენი და საქმეში არსებული მტკიცებულებები იუსტიციის უმაღლესი საბჭორს მიერ შესწავლილი, შეფასებული იქნეს და ასევე, შესაბამისი დასკვნა იქნეს გაკეთებული“, - აცხადებს ადვოკატი.
მისი განმარტებით, მოსამართლემ განაჩენში ისეთი მტკიცებულებები შეაფასა, რომელიც სასამართლოში გამოკვლეული საერთოდ არ ყოფილა.
„როცა განაჩენი მივიღეთ, აბსოლუტურად გაოგნებულები დავრჩით. ნათია გუდაძის განაჩენი ვარაუდზეა გამყარებული. ის საქმეში არსებულ იმ მტკიცებულებებზე არ საუბრობს, რომელიც ზურა ქუთელიას უდანაშაულობას ამტკიცებს. ქუთელიას მიერ აღნიშნულის ჩადენას ფაქტად უდევს აბსრუდრული, მოსამართლის მიერ შეთხზული ფაქტები.
გუდაძეს განაჩენში ზურაბ ქუთელიას სავარჯიშო დარბაზში ყოფნის პერიოდად ექპერტიზის დასკვნა კი არ აქვს მითითებული, არამედ მოწმის მიერ მიცემული ინფორმაცია აქვს გამოყენებული. ზურაბ ქუთელიას მანქანის გადადგილების უწყვეტ რეჟიმს ვიდეო-სათვალთვალო კამერები გვიჩვენებს, ნათია გუდაძეს კი, განაჩენში უწერია, რომ ბექა კირვალიძე და ზურაბ ქუთელია, არტემ აგაჯანოვს შეუთანხმდნენ და ბერი გაბრიელ სალოსის #2-ში გაემართნენ, სადაც განზრახვა სისრულეში მოიყვანეს. როგორ მოელაპარაკნენ ქუთელია და კირვალიძე ერთად აგაჯანოვს და როგორ გაემგზავრნენ ერთად, როცა ქუთელია იმ მომენტში უტყუარი მტკიცებულებით, სპორტდარბაზში იმყოფებოდა?
ამას გარდა, ნათია გუდაძეს განაჩენში ისეთი მტკიცებულება აქვს შეფასებული, რომელიც სასამართლო პროცესზე გამოკვლეული საერთოდ არ ყოფილა“, - აცხადებს ბარდაველიძე.
ცნობისთვის, ქუთელიას ოჯახის წევრები და ახლობლები აქციებს პერიოდულად მართავენ. მათ ბოლოს, განაჩენი პროკურატურასთან გაასაჩივრეს.
13 მარტს, თბილისის საქალაქო სასამართლომ როსტომაშვილზე თავდასხმის საქმეზე სამივე ბრალდებული დამნაშავედ ცნო. მოსამართლე ნათია გუდაძემ ზურაბ ქუთელიას 7 წლით, არტემ აგაჯანოვს 6 წლით, ხოლო ბექა კირვალიძეს 10 წლით თავისუფლების აღკვეთა მიუსაჯა.
