ხორავას ქუჩაზე მოზარდებს შორის მომხდარ მკვლელობაში ერთ-ერთი ბრალდებულის ადვოკატის, ტარიელ კაკაბაძის განცხადებით, დღეს დალითხულმა მოწმემ გამოძიების ეტაპზე მიცემული ჩვენება შეცვალა.
"დღეს დაკითხულმა მოწმემ, ისევე, როგორც ჯერჯერობით დაკითხულმა, აბსოლუტურად ყველა მოწმემ, კატეგორიულად შეცვალა გამოძიებაში მიცემული ჩვენებები. რა თქმა უნდა, ბრალდების მხარე მიიჩნევს, რომ ეს არა შეცვლა, არამედ მათი ტერმინით რომ ვისარგებლო, არის შელამაზება. თუმცა, როდესაც მოწმე ერთსა და იმავე გარემოებებთან დაკავშირებით აბსოლუტურად განსხვავებულ ინფორმაციას აწვდის გამოძიებას და სასამართლოს, უნდა მივიჩნიოთ, რომ მოწმის ჩვენებები ერთმანეთისგან მკვეთრად განსხვავდება. მოწმის ჩვენებები ასევე ეწინააღმდეგება სხვა დაკითხულ მოწმეთა ჩვენებებს და სხვა მტკიცებულებებს, რომელიც საქმეში არსებობს. რა თქმა უნდა, დაცვის მხარე ამ ყველაფერს დასკვნით სიტყვაში დავასაბუთებთ. როდესაც ყველა მოწმე მნიშვნელოვან გარემოებებთან დაკავშირებით ჩვენებებს ცვლის, ჩნდება ეჭვი, ვინმე ხომ არ არის დაინტერესებული, რომ მოწმემ სასამართლოს არასწორი ინფორმაცია მიაწოდოს", - განაცხადა კაკაბაძემ.
შემდეგი სასამართლო პროცესი, 3 აპრილს, 10:30 საათზე ჩაინიშნა.
