მიხეილ სააკაშვილის საქმის პროკურორი ირაკლი ნადარეიშვილის განცხადებით, დაცვის მხარის მიერ პროცესის გადადება მხოლოდ და მხოლოდ საქმის გაჭიანურებას ემსახურება.
"დღევანდელ სასამართლო პროცესზე დაცვის მხარის კიდევ ორი ადვოკატი გამოცხადდა. მათ შორის დავით კაკოიშვილი, რომლის მიმართაც პირველი ინსტანციის სასამართლოში ბრალდებულ მიხეილ სააკაშვილის პოზიციის თანახმად, მისთვის აცილება იქნა დაყენებული. დღეს პროცესზე კაკოიშვილი გამოცხადდა და ახალი ორდერი წარმოადგინა, რაც ბრალდების იმ პოზიციას ადასტურებს, რომ დავით კაკოიშვილის ქმედებები მხოლოდ და მხოლოდ პროცესის გაჭიანურებას ემსახურება. ეს მისი ტაქტიკაა და ამას არავითარი შემხებლობა არ აქვს საქმესთან. ბატონმა კაკოიშვილმა განაცხადა, თითქოს ის არ იცნობდა აღნიშნული სისხლის სამართლის საქმეს. სასამართლოდან კონკრეტული დოკუმენტაცია გამოსათხოვი და შესასწავლი ჰქონდა. მე კი, საზოგადოებას შევახსენებ რომ ბატონი კაკოიშვილი ბოლო მომენტამდე ბრალდების მხარის დასკვნითი სიტყვის წარმოთქმის მომენტშიც კი იმყოფებოდა სასამართლო სხდომებზე, შესაბამისად, მას რაიმე ახალი გარემოების შესწავლა არ მოუწევდა, ამდენად მისი განცხადება რომ რაიმე მასალის გასაცნობად გონივრული ვადა ესაჭიროებოდა და ეს იქნებოდა ორი კვირა, ჩვენი აზრით, ეს განცხადება სამართლიანი და ობიექტური არ იყო, თუმცა სასამართლომ მათი შუამდგომლობა დააკმაყოფილა. შემდეგ სხდომებზე ჩვენს პოზიციებს გავაჟღერებთ სააპელაციო სასამართლოში და ქალაქ თბილისის საქალაქო სასამართლოს განაჩენსაც დავასაბუთებთ", - განაცხადა პროკურორმა ირაკლი ნადარეიშვილმა.
ცნობისთვის, სააპელაციო სასამართლოში დღეს ჩანიშნული სხდომა დაცვის მხარის შუამდგომლობით, 10 აპრილისთვის გადაიდო.
