ამ წუთებში, უზენაეს სასამართლოში დავით ოთხმეზურის მკვლელობაში გამართლებულის, ასლან ბეჟანიძის საასმართლო პროცესი მიმდინარეობს. სხდომა 09:30 საათზე დაიწყო.
მხარეები დღეს რეპლიკებს წარმოთქვამენ. პროცესი უეზენაეს სასამართლოში გუშინაც მიმდინარეობდა. სხდომა 7 საათზე მეტ ხანს გაგრძელდა.
პროკურატურამ უზენაეს სასამართლოში ორი ინსტანციის მიერ ბეჟანიძის მიმართ გამოტანილი გამამართლებელი განაჩენი გაასაჩივრა.
მოსამართლეთა კოლეგიაში, უზენაესი სასამართლოს თავმჯდომარე, ნინო გვენეტაძეც შედის.
ცნობისთვის, 2004 წლის 27 ოქტომბერს, თბილისში, აკადემიკოს მარიკა ლორთქიფანიძის 18 წლის შვილიშვილი, დავით ოთხმეზური მოკლეს. აღნიშნულ საქმეზე პროკურატურა 11 წლის განმავლობაში დუმდა. 2015 წელის მარტში კი პროკურატურამ აღნიშნულ საქმეზე გამოძიება გააქტიურა. 2016 წლის 26 მარტს, სასამართლოს განჩინების საფუძველზე ასლან ბეჟანიძე დააკავეს. პროკურატურა ირწმუნებოდა, რომ 2004 წლის მკვლელობის დღეს, დავით ოთხმეზურსა და ასლან ბეჟანიძეს შორის კონფლიქტი მობილიურ ტელეფონთან დაკავშირებით წარმოიშვა, რა დროსაც, ბეჟანიძემ ოთხმეზურს დანით რამდენიმე ჭრილობა მიაყენა და შემთხვევის ადგილიდან მიიმალა.
2016 წლის 22 დეკემბერს, თბილისის საქალაქო სასამართლომ ასლან ბეჟანიძე უდანაშაულოდ სცნო და პატიმრობიდან გაათავისუფლა.
4 ოქტომბერს კი, თბილისის სააპელაციო სასამართლომ საქალაქო სასამართლოს განაჩენი ძალაში დატოვა.
