2016 წლის 6 ნოემბერს, ვარკეთილის ხიდებთან მომხდარი ავტოსაგზაო შემთხვევის შედეგად გარდაცვლილი 18 წლის როინ ტურაშვილის ოჯახის წევრები მძღოლის დასჯას მოითხოვენ.
მათი ინფორმაციით, სასამართლოში საქმის განხილვა ხელოვნურად ჭიანურდება და ბრალდებულს მაღალჩინოსნები მფარველობენ.
როგორც გარდაცვლილის დედა, მზია სარქისაშვილი აცხადებს, პროცესი დღეს, 13:00 საათზე იყო ჩანიშნული, თუმცა, ბრალდებულის ადვოკატის შეცვლის გამო, ის გადაიდო.
"ჩემი შვილი ვარკეთილის ხიდებთან ტროტუარზე ფეხით მოდიოდა და მანქანამ დაარტყა. მძღოლი ტროტუარზე ავარდა გახეთქილი მთვრალი. ჩემმა შვილმა იქვე დაასრულა სიცოცხლე. მძღოლი შოთა ჯიქია დაკავებული არ არის, მკვლელი 2 დღეში გირაოთი გამოუშვეს, ასეთი რამე გაგიგიათ?
საქმე 4 თვეა ჭიანურდება, უკვე მესამე ადვოკატი გამოცვალეს. საქმეს ხელოვნურად აჭიანურებენ, გავა კიდევ 2 წელი და მკვლელს გარეთ დატოვებენ.
მინდა როგორ წესია ისე, 7 წელი მიესაჯოს, რადგან ის მკვლელია.
ჩემი შვილი პირველი კურსის სტუდენტი იყო",- აცხადებს სარქისაშვილი.
არსებული ინფორმაციით, ავტოსაგზაო შემთხვევაში ბრალდებულს მართვის უფლება არ შეჩერებია და ის კვლავ მანქანით გადაადგილდება. როგორც ბრალდებულის ადვოკატი, ალექსანდრე კობაიძე აცხადებს, მართვის უფლება ჯიქიას მანამდე ვერ შეუჩერდება, სანამ ბრალი არ დაუმტკიცდება. რაც შეეხება იმას, ექსპერტიზით დადასტურდა თუ არა მძღოლის სიმთვრალე, ადვოკატი აცხადებს რომ ამ კითხვაზე შეგნებულად არ პასუხობს.
