ტერორისტული ორგანიზაციისათვის და მისი წევრებისათვის დახმარების გაწევაში ბრალდებულების საქმის პროკურორის, ნანა ხუნჯუას განცხადებით, საქმეზე არსებული მტკიცებულებები ბრალდებულთა მიერ ჩადენილ დანაშაულს სრულად ადასტურებს.
"ჩადენილი დანაშაულის მასშტაბურობიდან გამომდინარე, გამოძიებას ამ საქმის დასასრულებლად 4 თვე დასჭირდა. შესაბამისად, ბრალდების მხარემ სასამართლოში საკმაოდ მოცულობითი სია წარადგინა მტკიცებულებათა ჩამონათვალისა, რომლის გამოკვლევასაც არსებით განხილვაზე ვაპირებთ. საგამოძიებო მოქმედებების შედეგად მოპოვებული ნივთიერი მტკიცებულებები და მათზე ჩატარებული სხვადასხვა ექსპერტიზის დასკვნები, ასევე ფიჭური კავშირგაბმულობის კომპანიებიდან გამოთხოვილი ინფორმაციები, სათვალთვალო ვიდეო კამერების ჩანაწერები და სხვა მტკიცებულებათა ერთობლიობა ერთადერთი დასკვნის გაკეთების საშუალებას იძლევა, რომ ბრალდებულებმა ნამდვილად ჩაიდინეს მათთვის ბრალად შერაცხული ქმედება",- განაცხადა ნანა ხუნჯუამ.
ცნობისთვის, დაკავებული 8 პირიდან, 6 მათგანს ბრალი ტერორისტული ორგანიზაციის და ტერორისტებისთვის ხელშეწყობისთვის აქვს წაყენებული, ხოლო 2-ს ტერორისტული ორგანიზაციის წევრობისთვის.
