შინაგან საქმეთა მინისტრის მოადგილემ, ნინო ჯავახაძემ, საპარლამენტო კომიტეტების გაერთიანებულ სხდომაზე, სადაც ევროკავშირთან საქართველოს ვიზის ლიბერალიზაციის პროცესის მიმდინარეობაზე იმსჯელეს, განაცხადა რომ იგეგმება სისხლის სამართლის კოდექსში ცვლილებების განხორციელება, რომელიც იმ ქმედებების კრიმინალიზაციას ახდენს, რასაც უკანონო მიგრაციის ხელშეწყობა ჰქვია.
მომხსენებლის ინფორმაციით, მიმდინარე წლის აპრილში, საქართველოში, იგეგმება ევროპის საზღვრისა და სანაპირო დაცვის სააგენტოს (Frontex) დელეგაციის ვიზიტი, რომლის ფარგლებშიც არალეგალური მიგრაციის პრობლემასთან ბრძოლის დამატებით შესაძლებლობებს განიხილავენ.
