საქართველოს სავაჭრო-სამრეწველო პალატასთან არსებულმა საერთაშორისო საარბიტრაჟო ცენტრმა (GIAC) ბიზნეს-სექტორს უცხოელ ბიზნეს-პარტნიორებთან ურთიერთობისას არბიტრაჟის კუთხით გასათვალისწინებელი პრაქტიკა გააცნო. ღონისძიებას სავაჭრო-სამრეწველო პალატის წევრი კომპანიები და პალატის საბჭოს წევრი 36 უმსხვილესი ბიზნეს-ასოციაციის წარმომადგენლები ესწრებოდნენ, რომლებსაც აქვთ ბიზნეს-ურთიერთობები უცხოელ პარტნიორებთან, ხშირად უწევთ მათთან ხელშეკრულების დადება და სამართლებრივ ურთიერთობებში შესვლა.
ღონისძიება საქართველოს სავაჭრო-სამრეწველო პალატის პრეზიდენტმა ნინო ჩიქოვანმა გახსნა, შემდეგ კი გაიმართა სემინარი თემაზე: დავების გადაწყვეტის მექანიზმის შერჩევა უცხოელ ბიზნეს პარტნიორთან და პროცესის წარმოება (საუკეთესო მიდგომა და პრაქტიკული რჩევები);
ღონისძიების ფარგლებში დავების გადაწყვეტის მექანიზმის მნიშვნელობა და არსი განიხილეს, ასევე საუბარი შეეხო საარბიტრაჟო შეთანხმების შედგენისას გასათვალისწინებელ ფაქტორებს. სემინარმა დისკუსიის ნაწილიც მოიცვა. ბიზნეს-სექტორის წარმომადგენლებს საშუალება ჰქონდათ არბიტრაჟის ინსტიტუტთან და საარბიტრაჟო პრაქტიკასთან დაკავშირებულ ნებისმიერ თემაზე კითხვები დაესვათ და პრობლემური საკითხის შემთვევაში გამოსავლის გზებზე ემსჯელათ.
„არბიტრაჟი არის დავების განხილვის ალტერნატიული მექანიზმი, რომელიც განსაკუთრებით აუცილებელია კომპანიებისთვის, როდესაც ისინი საერთაშორისო ხელშეკრულებებს დებენ. ქართული კომპანიებისთვის ამის თაობაზე ინფორმაციის მიწოდება არის მნიშვნელოვანი იმიტომ, რომ ამ მექანიზმს სჭირდება პოპულარიზაცია. საქართველოს სავაჭრო-სამრეწველო პალატასთან ფუნქციონირებს საერთაშორისო საარბიტრაჟო ცენტრი, რომლის მიზანა არბიტრაჟის დარგის განვითარება ზოგადად ქვეყანაში და საარბიტრაჟო სასამართლოს წარმოება. ამ ცენტრს ფუნქციონირების განმავლობაში, უფრო და უფრო მეტი ქართული კომპანია იყენებს თავის ხელშეკრულებებში როგორც დავების გადაწყვეტის მექანიზმს. ეს მექანიზმი დროშია მოქნილი, ასევე სასამართლოს განტვირთვის კუთხითაც მნიშვნელოვან როლს შეასრულებს“, - განაცხადა ნინო ჩიქოვანმა.
საქართველოს საერთაშორისო საარბიტრაჟო ცენტრი სავაჭრო-სამრეწველო პალატამ 2013 წელს დააფუძნა. იდეა საერთაშორისო პრაქტიკიდან გამომდინარე გაჩნდა. ორგანიზაციის შექმნამდე ამ საკითხზე აქტიურად იმუშავეს პალატისა და მისი პარტნიორი ორგანიზაციების წარმომადგენლებმა. ასევე, საარბიტრაჟო ცენტრის შექმნის პროცესში მნიშვნელოვანი როლი სამუშაო ჯგუფმა ითამაშა, რომელიც როგორც სახელმწიფო უწყებების, ასევე მესამე სექტორის წარმომადგენლებისგან შედგებოდა. საქმიანობის განხორციელების პროცესში საქართველოს საერთაშორისო საარბიტრაჟო ცენტრი სავაჭრო-სამრეწველო პალატისგან აბსოლუტურად დამოუკიდებელია. საქართველოს საერთაშორისო საარბიტრაჟო ცენტრი არის პირველი და ერთადერთი საარბიტრაჟო ინსტიტუტი საქართველოში, რომელიც არ არის ორიენტირებული მოგებაზე.
