რუსთავის ჟიული შარტავას სახელობის მე-4 სკოლაში იძულებით ლოცვასთან დაკავშირებით სახალხო დამცველმა მოკვლევა დაიწყო, - ამის შესახებ „ჯი-ეიჩ-ენს“ ომბუდსმენის აპარატში განუცხადეს.
ომბუდსმენის აპარატთან ერთად, მოკვლევა დაიწყო თავად სკოლამაც. სკოლის შიგნით მე-4 კლასის მასწავლებელზე, რომლის მიმართაც მშობელს პრეტენზიები აქვს, დისციპლინური წარმოება მიმდინარეობს.
ცნობისთვის, 21 მარტს „ჯი-ეიჩ-ენს“ ამავე სკოლის მოსწავლის მშობელი დაუკავშირდა, რომელმაც გვითხრა, რომ დაწყებითი კლასის მასწავლებელი გაკვეთილების დაწყების წინ და დამთავრების შემდეგ მოსწავლეებს ლოცვას აიძულებს.
მშობელმა, რომელმაც ანონიმად დარჩენა გადაწყვიტა, გვითხრა, რომ გარდა ლოცვის იძულებისა, მასწავლებელი გოგონებს კაბების ჩაცმაც მოსთხოვა და უთხრა, რომ ეკლესიურად, შარვლის ტარება ცოდვაა.
ფაქტის გადასამოწმებლად „ჯი-ეიჩ-ენი“ თავად მასწავლებელ ლ.ღ.-ს დაუკავშირდა, რომელმაც ლოცვის ფაქტი დაადასტურა, ოღონდ აქვე ხაზი გაუსვა, რომ ეს მხოლოდ და მხოლოდ მოსწავლეების სურვილით ხდება და არა დაძალებით.
მისივე განცხადებით, ფორმაზე ნამდვილად გააფრთხილა მოსწავლეები, მხოლოდ იმიტომ რომ სკოლას აქვს ასეთი მოთხოვნა. გოგონებისთვის შარვლის აკრძალვის ფაქტი კი, მან კატეგორიულად უარყო.
„ჯი-ეიჩ-ენი“ აკვირდება მე-4 სკოლის ირგვლივ განვითარებულ მოვლენებს და მოკვლევის დასრულების შემდეგ, შედეგებს გაგაცნობთ.
პირველი სტატია შეგიძლიათ იხილოთ აქ.
