ირლანდიური „ლოუ-კოსტერი“ Ryanair-ი, რომელიც უკრაინის ბაზარზე ოპერირებას ოქტომბრიდან დაიწყებს, ქვეყანაში შვილობილი ავიაკომპანიის შექმნასაც არ გამორიცხავს. თუმცა ამ ყველაფერს წინ უნდა უძღოდეს უკრაინის ბაზარზე ავიაკომპანიის გაფართოება და ადგილზე თვითმფრინავების ბაზირების პროცესის დაწყება.

„ჩვენ დარწმუნებულნი ვართ, რომ უახლოესი 2 წლის განმავლობაში მინიმუმ ორ აეროპორტს დავამატებთ. ასევე იქნება უფრო მეტი მარშრუტები კიევიდან და ლვოვიდან. შემდეგი ნაბიჯი, რომელიც ჩვენ უკრაინის ინფრასტრუქტურის მინისტრთან ვოლოდიმირ ომელიანთან უკვე განვიხილეთ, ბაზის შექმნაა. ეს მოხდება მას შემდეგ, რაც ჩვენ 3-4 აეროპორტი გვექნება ათვისებული. ვიმედოვნებთ, რომ უკრაინაში უფრო განვითარდებით ვიდრე პოლონეთში“, განაცხადა Ryanair-ის  ხელმძღვანელმა მაილ ოლირიმ.

ოლირი აცხადებს, რომ Ryanair-ის „შვილობილი“ ავიაკომპანიის ჩამოყალიბებაზე დეტალური საუბარი ამ დროისათვის ნაადრევია, რადგანაც ავიაკომპანიამ ჯერ ოპერირება უკრაინის 4 აეროპორტიდან უნდა მოახდინოს, შემდეგ ქვეყანაში საკუთარი ბაზა გახსნას და შემდგომ IT-ცენტრიც უნდა ჩამოაყალიბოს.

Ryanair-ი უკრაინის მიმართულებით, საუბარია ლვოვისა და ბორისპილოს აეროპორტებზე, კვირაში 32 რეისის განხორციელებას გეგმავს.

Ryanair-ი უკრაინულ ბაზარზე ოპერირებას ოფიციალურად ოქტომბრიდან შეუდგება.

უკვე გაწერილი განრიგების მიხედვით რეისები შემდეგი მიმართულებით განხორციელდება:

ბოისპოლის საერთაშორისო აეროპორტში Ryanair-ი​ განახორციელებს ფრენებს ბარსელონადან, ბრატისლავადან, გდანსკიდან, ვილნიუსიდან, კრაკოვიდან, ლონდონიდან, პოზნანიდან, ვროცლავიდან, სტოკჰოლმიდან და ვარშავადან.

რაც შეეხება ლვოვს, ლვოვის აეროპორტში Ryanair-ი რეისებს განახორციელებს დიუსელდორფიდან, კრაკოვიდან, ლონდონიდან, მიმინგენიდან და ვარშავადან.