კრიმინალური პოლიციის ყოფილი უფროსის, ზაზა ბაქრაძის ჩვენებით, მან ბუტა რობაქიძის მკვლელობის ადგილის გაყალბებაში მონაწილეობა მიიღო.
მისი თქმით, იარაღები შემთხვევის ადგილზე ზურაბ მიქაძემ მიიტანა.
"რაციით გახდა ცნობილი რომ წერეთლის გამზირზე იყო დაპირისპირება მოქალაქეებსა და პოლიციას შორის. მერე დაურეკეს ლევან გვაზავას და უთხრეს რომ ერთი ადამიანი იყო დაჭრილი. ადგილზე მივედით გვაზავა, იაშვილი, ფირცხალავა, დონაძე და მიქაძე.
მომიყვა რომ შემთხვევით გაუვარდა პატრულს და გარდაიცვალა ადამიანი. ვუთხარი, დანაშაული გახსნილია, დააკავეთ და კრიმინალური პოლიცია დაგეხმარებათ რაც საჭიროა იმაში-მეთქი. ესე არ გამოვაო, მითხრეს, იარაღებით არ არიან მაგრამ უნდა იყვნენო. ჩემთვის ყველაფერი გასაგები იყო რომ უნდა მომხდარიყო შემთხვევის ადგილის გაყალბება და იარაღების ჩადება. კრიმინალური პოლიციის მაღალჩინოსნები უარზე ვიყავით და საუბარი ფაქტობრივად კონფლიქტში გადაიზარდა. მითხრეს თუ პრეტენზია მქონდა, დავმჯდარიყავი მანქანაში და მივსულიყავი გენერალურ პროკურორ ადეიშვილთან. ამის შემდეგ გავჩუმდი.
მზად ვარ თუ დადასტურდა ჩემი ჩვენების არასანდოობა და ცრუ ჩვენება, დამატებითი მუხლითაც ვაგო პასუხი. მე მივიღე მონაწილეობა შემთხვევის ადგილის გაყალბებაში. როცა ბართაია წამოაყენეს ხელყუმბარა ჩამოუვარდა, ავიღე მე და ჩავუდე.
იარაღების მიტანის გადაწყვეტილება მივიღეთ. იარაღები თავის სამსახურის მანქანით ვაკე-საბურთალოს სამმართველოდან ზურაბ მიქაძემ მოიტანა.
იაშვილმა დარეკა სამმართველოში და უთხრა, რომ მისთვის გამოეტანებინათ იარაღი.
ვინ ვის, რას უდებდა ვერ გეტყვით. გაყალბებული შემთხვევის ადგილის გადაღებას აწარმოებდა გურამ დონაძე", - განაცხადა ბაქრაძემ.
