რუსეთის პრეზიდენტი დიმიტრი მედვედევი აცხადებს, რომ ბელორუსის პრეზიდენტმა ალექსანდრე ლუკაშენკომ აფხაზეთისა და ე.წ. სამხრეთ ოსეთის დამოუკიდებლობის აღიარების პირობა თავისი კოლეგების თანდასწრებით დადო. ეს განცხადება მედვედევმა სოჭში ჟურნალისტებთან შეხვედრის დროს გააკეთა.
რუსეთის პრეზიდენტმა ასევე აღიარა, რომ რუსეთი აფხაზეთის და ე.წ. სამხრეთ ოსეთის საერთაშორისო დონეზე დამოუკიდებლობის აღიარებით არის დაინტერესებული, თუმცა ეს მისი თვითმიზანი არ არის.
"ჩვენ დაინტერესებულები ვართ რომ ისინი აღიარონ. მაგრამ ეს თვითმიზანი არ არის. ასეთი ამოცანა ჩვენს წინაშე არ მდგარა და არც დგას.
ხოლო, რაც შეეხება მინსკს, ბელორუსის პრეზიდენტმა ადრე თავად აღიარა, რომ მას მიღებული აქვს მყარი გადაწყვეტილება რომელიც აფხაზეთის და ე.წ. სამხრეთ ოსეთის აღიარებას ეხება.
აღიარების პირობა მან დსთ-ს ქვეყნების ლიდერების თანდასწრებით დადო. მან თქვა: მე საზეიმოდ პირობას ვდებ, რომ მე ყველაფერს გავაკეთებ ყველაზე მოკლე დროში", - განაცხადა მედვედევმა.
