საქართველოსა და ბელარუსის სავაჭრო-სამრეწველო პალატების ორგანიზებით, თბილისში საქართველო-ბელარუსის ბიზნეს-ფორუმი გაიმართა. ბიზნეს-დელეგაცია საქართველოში ბელარუსის რესპუბლიკის პრეზიდენტის, ალექსანდრ ლუკაშნკოს ვიზიტის ფარგლებში ჩამოვიდა.
ბიზნეს-ფორუმი საქართველოს პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა, ბელარუსის რესპუბლიკის პრემიერ-მინისტრის მოადგილემ მიხაილ რუსიმ, საქართველოს სავაჭრო-სამრეწველო პალატის პრეზიდენტმა ნინო ჩიქოვანმა და ბელარუსის სავაჭრო-სამრეწველო პალატის თავმჯდომარემ ვლადიმერ ულახოვიჩმა გახსნეს.
ფორუმის ფარგლებში შედგა ქალაქ მინსკის ბიზნეს-სექტორისა და საქალაქო აღმასრულებელი კომიტეტის წარმომადგენლების შეხვედრა სექტორულ ქართულ კომპანიებთან და ბელარუსული პროდუქციის გამოფენა. ასევე, ადგილზე ქართულ და ბელარუსულ კომპანიებს შორის 29 ხელშეკრულება გაფორმდა. ღონისძიებაზე დასასწრებად საქართველოს სავაჭრო-სამრეწველო პალატაში რეგისტრირებული იყო საქართველოს ბიზნეს-სექტორის 190-მდე წარმომადგენელი და ჩაინიშნა 500-მდე ორმხრივი შეხვედრა.
"საქართველო-ბელარუსის ბიზნეს ფორუმში 64-ზე მეტი ბელარუსული კომპანიის 117-მა წარმომადგენელმა მიიღო მონაწილეობა. ძალიან მაღალია ინტერესი ქართული კომპანიების მხრიდანაც. ვიზიტის ფარგლებში 8 მლნ ნახევარ დოლარზე მეტი ღირებულების ხელშეკრულებებს მოეწერა ხელი. ბოლო სამი წლის განმავლობაში მესამე ფორუმია და ინტერესი ორივე ქვეყნის კერძო სექტორებიდან ძალიან მაღალია, რაზეც მეტყველებს გაზრდილი სავაჭრო ბრუნვა. საქმიანობის სფეროს ფართო სპექტრია წარმოდგენილი, მათ შორის მშენებლობა, სასოფლო-სამეურნეო ტექნიკა, ფარმაცევტული ბიზნესი, ტურიზმი და ა.შ. სექტორების ფართო სპექტრია წარმოდგენილი", - განაცხადა ჩიქოვანმა.
2018 წლის იანვარში საქართველოსა და ბელარუსის რესპუბლიკას შორის სავაჭრო ბრუნვა 91 პროცენტით გაიზარდა, მათ შორის, ექსპორტმა საქართველოდან 47 პროცენტით მოიმატა. ამასთანავე, 2018 წლის იანვარ-თებერვალში ბელარუსიდან საქართველოში ტურისტების რაოდენობა, წინა წლის ანალოგიურ პერიოდთან შედარებით, 19 პროცენტით არის გაზრდილი.
