ბორჯომის ხეობაში ცეცხლის ახალის კერები გაჩნდა. მეხანძრეები მათ ლიკვიდირებას ცდილობენ. ამის შესახებ "ჯი-ეიჩ-ენს" სატყეო დეპარტამენტის თავმჯდომარე პაპუნა ხაჩიძემ განუცხადა.
"გუშინ ღამით, ტყეში ციცინათელებივით, ძალიან ბევრი ახალი, პატარა კერა გაჩნდა", - განაცხადა ხაჩიძემ "ჯი-ეიჩ-ენთან" საუბარში.
მისივე თქმით, ხეობაში სახანძრო - სამაშველო საშუალებები დღეს, დილის 07:00 საათიდან განახლდა. ხაჩიძის ინფორმაციით, ცეცხლის ჩაქრობას ამ დროისთვის, მეხანძრეებთან ერთად 3 ვერტმფრენი ცდილობს.
"იმ ადგილებზე, სადაც ფეხით მისვლაა შესაძლებელი მეხანძრეები ცდილობენ ცეცხლის ლიკვიდირებას, ხოლო ადამიანისთვის მიუდგომელ ადგილებზე ავიაცია მუშაობს", - განაცხადა ხაჩიძემ და დასძინა, რომ ხეობაში ქარი არ ქრის, რაც ცეცხლის ლიკვიდირების პროცესს აიოლებს.
როგორც ცნობილია, ხანძრის ლიკვიდაციის პროცესს სამცხე-ჯავახეთის მეხანძრეებთან ერთად, შიდა ქართლის და იმერეთის შესაბამისი სტრუქტურების თანამშრომლებიც შეუერთდნენ. მეხანძრეებს ადგილობრივი მოსახლეობა და შინაგან საქმეთა სამინისტროს თანამშრომლებიც ეხმარებიან.
წინასწარი მონაცემებით, დამწვარია 20 ჰექტარამდე ფართობი. იწვის იშვიათი ჯიშის ხეებიც.
ხანძრის ჩაქრობაში ჩართულია ვერტმფრენები და სახანძრო მანქანები. სულ კერების ლიკვიდირებას 150-ზე მეტი მეხანძრე და ადგილობრივი მოსახლეობა ცდილობს.
